Срогы чыккан товар сатучыны судка бирергә дә була

10 октябрь 2019 ел., пәнҗешәмбе

Товар сатып алганда, аның саклану срогына нык игътибар итәргә кирәк. Ул аның төргәгендә күрсәтелә, чөнки кулланырга яраклылык срогы чыккан товарлар сезнең кесәгә генә түгел, сәламәтлеккә дә зыян салырга мөмкин.

“Кулланырга яраклылык срогы” язуының мәгънәсенә төшенеп карыйк әле. Бу - күрсәтелгән срок узгач, товар кулланырга яраксыз, дигәнне аңлата. Ул аның эшләп чыгару вакытыннан алып, санап яки куллануга яраклылыкның чик срогы рәвешендә күрсәтелә. Әгәр төргәктә мондый мәгълүмат булмаса, бу бик җитди кагыйдә бозу санала.

Яраклылык срогы турында мәгълүмат азык-төлек продуктларында, парфюмерия-косметика товарларында, медикаментларда, көнкүреш химиясендә һәм билгеле бер срок үткәннән соң аны куллану, тормыш, сәламәтлек өчен куркыныч тудырган, мөлкәткә, табигатькә зыян салырга мөмкин булган башка товарларда булырга тиеш. Срогы чыккан товарны реализацияләү катгый тыела. Алай гына да түгел Россия Федерациясе Гражданнар кодексының 472 маддәсенең 2 пункты буенча сатучы яраклылык срогы чикләнгән товарны сатып алучыга биргәндә, аны кулланырга вакыт калуын да исәпкә алырга тиеш.

Практикада кибетләрдә срогы чыгып барган товарның яраклылык турында мәгълүматын яңага алмаштыру яисә аны үзбуйлап озайту очраклары күзәтелгәли. Гомумән, яраклылык срогын бозып саткан товар өчен сатып алучы матди гына түгел, әхлакый зыян өчен дә түләттерә ала.

“Кулланучы хокукларын яклау турында”гы Федераль законның 17 маддәсенә һәм Россия Федерациясе Гражданнар процессуаль кодексына туры китереп, кулланучы бу очракта үзенең яшәү урыны яисә барган урыны, яки җавап бирүче урнашкан урын, сату-алу килешүе төзелгән урын буенча судка дәгъва белдерә ала. Аннан дәүләт пошлинасы да түләттерелмәячәк.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования