Район халкын үз-үзеңне изоляцияләү режимына аңлап һәм тулы җаваплылык белән карарга чакырабыз
Татарстанда, шул исәптән Буа муниципаль районында да, үз-үзеңне изоляцияләү режимы кертелде. Кичә, районның хокук саклау органнары хезмәткәрләре урамнарда халык белән аңлату эшләре алып бардылар. Район эчке эшләр бүлегенең җәмәгать тәртибен саклау бүлеге башлыгы Сергей Рахманов сүзләренә караганда, үз-үзеңне изоляцияләү режимын бозган өчен административ җаваплылык каралган. Тәртип сакчылары өлкәннәрне аеруча кисәтте, чөнки 65 яшьтән өлкәнрәк гражданнар үз йортларын ташлап китәргә тиеш түгел, әгәр аларның тормышына һәм сәламәтлегенә турыдан-туры куркыныч янамаса.
Буалылар, исегезгә төшерәбез, элемтәләр санын киметү һәм коронавирус инфекциясе таралуны туктату өчен, илдә тиешле чаралар күрелгән. 30 марттан Татарстан территориясендә республиканың барлык халкы өчен үз-үзеңне изоляцияләү режимы кертелде. Бу вакытны гражданнарга уңайлы уздыру өчен яңа сервис эшли башлады, анда өйдән чыгу өчен цифрлы пропусклар рәсмиләштерергә мөмкин. Кайнар линия телефоны: 8 (800) 250-90-33.
Санитар-эпидемияләргә каршы (профилактик) чаралар үткәрү турындагы таләпләрне үтәмәү административ штраф салуга китерә. Әгәр гражданин карантинны бозса, аны 15 меңнән 40 мең сумга кадәр штрафка тартачаклар. Санитар кагыйдәләрне бозуда һәм чараларны үтәмәүдә вазыйфаи зат гаепле булса, штраф 50 меңнән 150 мең сумга кадәр тәшкил итәчәк. Юридик затлар өчен-200 меңнән 500 мең сумга кадәр. Шулай ук эшчәнлеген утыз тәүлеккә административ туктатып тору да мөмкин.
Җәза катгыйлана, әгәр күрсәтелгән бозулар кеше сәламәтлегенә яки үлеменә китергән булса. Түбәндәге җәзаларны куллану мөмкин: гражданнар өчен - 150 меңнән 300 мең сумга кадәр; вазыйфаи затларга-300 меңнән 500 мең сумга кадәр штраф. Шулай ук бер елдан өч елга кадәр дисквалификацияләнергә мөмкин. Шәхси эшмәкәр һәм юридик затларга биш йөз меңнән алып 1 миллион сумга кадәр штраф салыначак. Шулай ук туксан тәүлеккә кадәр эшчәнлекне административ туктатып тору да мөмкин.
Саксызлык аркасында кешеләр күпләп авыруга яки агулануга, шулай ук саксызлык аркасында кешенең үлеменә китергән санитар-эпидемиологик кагыйдәләрне бозу Россия Федерациясе Җинаять Кодексының 236 статьясы нигезендә җинаять җаваплылыгына китерә. Бу җинаятьләр өчен максималь җәза-биш елга кадәр иректән мәхрүм итү.
Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР идарәсе мәгълүматларына караганда, Буа районында 2 апрельгә чит илдән килгән һәм күзәтү астында торган гражданнар саны -18 кеше. Иртәнге якта, карантинда булган тагын 7 граждан исәптән төшерелде. Район буенча яңа короновирус инфекциясе белән авыручылар теркәлмәгән.
Район халкын халыкның тормышын һәм сәламәтлеген саклау буенча хакимият органнары тарафыннан кабул ителә торган чараларга аңлап һәм тулы җаваплылык белән карарга чакырабыз.
Үзегезне саклагыз! Өйдә калыгыз!