Чаңгыга басучылар арта

Районда чаңгы спорты белән дуслашучылар саны артканнан арта – “Татарстан чаңгы юллары-2013” бәйгесендә ике меңгә якын  кеше стартка басты.

Наратлык урманы умарта оясын хәтерләтте ул көн-не. Спортчылар төркем-төркем дистанциягә чыгып китәләр. Берәм-берәм финишка киләләр, беришләре иптәшләрен каршы ала, көч бирә, икенчеләре “тән яза”. Ярышны төгәлләүчеләр кайнар чәй эчә, стартка әле вакытлары барлары район үзешчәннәренең концертын карый, аралаша, иптәшләренә көч биреп тора – кыскасы, шөгыльсез кеше юк. Урман һавасын сулау гына да ни тора!

Шулай да чаңгычыларның төп максаты – дистанцияне мөмкин кадәр тизрәк үтеп, җиңүчеләр арасына эләгү. Мәктәпләр укучылары арасында Югары Лашчы спортчылары үзара гына көч сынаштылар булып чыкты. Алар арасында 4-7 сыйныфлардан бары Р. З. Сәгъдиев исемендәге мәктәптән Данил Сидоров кына керде – икенче булды. Югарылашчылылардан пьедесталның беренче баскычына Алексей Андреев, Ангелина Александрова, өлкән сыйныфлар арасында Дмитрий Никонов, Кристина Петрова күтәрелделәр. Студентлардан ветеринария техникумы укучыларын узучылар булмады. Алардан Владислав Казаков белән Рузия Вәлиуллина җиңделәр.

Алардан соң 2 һәм 3 километрлы дистанцияләргә бер-бер  артлы оешма-предприятиеләр хезмәт-кәрләре, эшчеләре, укытучылар, җитәкчеләр һәм спорт ветераннары кузгалды. 45 яшькә кадәрге хатын-кызлар арасында беренче-икенче урыннарны бу спорт төрендә бер генә җиңү яуламаган Буа электр челтәрләреннән Татьяна Җәләлетдинова һәм “Буа газы” эксплуатация-җи-тештерү идарәсеннән Ландыш Хәйретдинова алдылар. Финиш сызыгын өченче булып Шәмәк авыл җирлеге башлыгы Ирина Никитина узды. “Район ярышларында беренче катнашуым, шуңа да җиңәрмен дип уйламаган да идем. Кызларым  белән авылыбыз Иске Мәртле янындагы урманда чаңгыда йөрүебез бушка китмәгән, димәк. Алда торган “Сәламәтлек” спартакиадасының чаңгы бәйгесендә дә катнашачакмын, үземне шулай ук җиңел атлетикада, шахмат буенча да сынаячакмын”, - ди актив, әйдәп баручы холыклы Ирина.

Ир-егетләрдән беренче-икенче урыннарда – шулай ук спорт сөючеләргә күптән таныш Сергей Гришин белән Сергей Батин. Алар икесе дә “Буа газы”нда эшлиләр. Өченчелекне Тәтеш авыл хуҗалыгы техникумыннан Айрат Ибраһимов алды. 45 яшьтән өлкәнрәк ир-егетләр арасында аның командадашы Николай Ложкин җиңде. Икенче-өченче урыннарны аучылар һәм балыкчылар җәмгыятеннән Сергей Тимофеев, эчке эшләр бүлегеннән Александр Кириллов бүлештеләр. 

Хатын-кызлардан Буа электр челтәреннән алыштыргысыз лидер Галина Дементьева барысын да узды. Машина төзү заводыннан Галина Дмитриева икенче, элеватордан Галина Тарасова өченче булып килде. 

60 яшьтән өлкәнрәкләрдән кабат Инсаф Гыймалетдинов беренче, икенче-өченче урыннарда да исемнәре яхшы таныш Идрис Усманов белән Ленар Гарифуллин. Хатын-кызлардан пьедесталга ветераннар җыелма командасыннан Җәмилә Симонова, Исәктән Зифа Гафиятова һәм Г. Рәхмәтуллина күтәрелделәр.  

Җиңүчеләргә яшьләр эшләре, спорт һәм туризм бүлегенең Мактау грамоталары, акчалата бүләкләре тапшырылды. “Бердәм Россия” партиясенең җирле бүлекчәсе дә бүләкләрен хәстәрләгән иде.

Бүгенге ярышта катнашучыларның күпчелеге иртәгә, 16 февраль көнне шулай ук Наратлык урманында Универсиадага багышлап “Сәламәтлек” спартакиадасында көчләрен сынаячаклар. Һәр командадан икешәр ир-егет һәм хатын-кызны анда 11 сәгатьтә көтеп калалар.