Яктыртылган трасса булачак!

Чаңгы спортын яратучылар өчен шатлыклы хәбәр – Наратлык урманында 1,5 километр озынлыгында яктыртылган трасса өлгертелеп килә. 

Район җитәкчелегенең инициативасын Татарстанның чаңгы узышлары һәм биатлон федерациясе хуплады һәм төзелеш өчен 3 миллион сумнан күбрәк акча бүлеп бирде. Сүз уңаеннан, яктыртылган трассалар бүгенге көндә Казанда, Яр Чаллыда, Яшел Үзәндә, Бөгелмә, Зәй районнарында бар. Шулай ук Теләче, Актаныш, Мамадыш районнарында сафка бастырыла. ТР Урман хуҗалыгы министрлыгы, “Челтәр компаниясе” ачык акционерлык җәмгыяте белән килештергәннән соң көзеннән чаңгы трассасы төзү эше башланып китте. Шунысын да әйтергә кирәк, “Челтәр компаниясе” генераль директоры Илшат Фәрдиев бер үк вакытта федерация президенты да. 

Яшьләр эшләре, спорт һәм туризм бүлеге начальнигы Ленар Вәлиуллин белдерүенчә, яктыртылган чаңгы юлын әзерләүгә бик күпләр үз өлешен керткән. Урман хуҗалыгы, 111 номерлы янгын часте, “Средневолжсксельэлектросетьстрой”, Буа “МППЖКХсы (инженерлык челтәрләре)” ачык акционерлык җәмгыятьләре, Буа электр челтәрләре хезмәткәрләре, укытучылар, спортчылар – шундыйлардан. Карлы елгасының иске үзәне буйлап салынган трассаны тигезләү өчен шикәр заводы транспортчылары дефекат ташыды. Хәзер баганаларны урнаштырып бетерәсе, аларны электр чыбыклары белән тоташтырып, яктырткычлар эләсе генә калды һәм карсыз урыннарга кар ташыйсы бар.

Адав-Толымбай авылына бару юлында урман авызының сул ягындагы мәйданчык һәм трасса үзе тиздән беренче чаңгычыларны каршыларга тиеш. Монда чаңгы мәйданчыгы, автомобильләр туктап тору урыны да булачак. Көз көне исә, шулай ук федерация ярдәме белән, юл буенда чишенеп-киенү, прокат өчен өйчекләр калкып чыгар, дип планлаштырыла. Ә җәй айларында әлеге трассаны велосипедчылар, скандинавия йөрешен хуплаучылар файдалана алачак. “Болар барысы да спортка мөмкин кадәр күбрәк кешене тарту, сәламәт яшәү рәвешен пропагандалау, теләгән һәркемгә чаңгыга басып, урман һавасы сулау, сәламәтлекне ныгыту мөмкинлеге бирәчәк”, - ди муниципаль район башлыгы Рафаэль Әбүзәров.