Илен сөйгән ир була

“Татарстан Республикасы яшьләрен патриотик рухта тәрбияләү” максатчан дәүләт программасы безнең районда да тулысынча гамәлгә ашырыла. Патриот булу яңадан актуальлек ала.

Район хәрби комиссары Радик Төхфәтуллин сүзләренә караганда, яшьләргә патриотик тәрбия бирүдә мәктәпләрдә кадет сыйныфлары булу зур роль уйный. Чөнки бу юнәлештә белем бирү укучыларда туган җиргә карата мәхәббәт уяту белән бергә, аларның дөньяга карашын формалаштырырга, сәламәт яшәү рәвеше алып баруны пропагандаларга, ир-егетләргә армия хезмәтенә чакырылу алдыннан психологик һәм физик әзерлек алырга ярдәм итә. Бездә кадет сыйныфы 2004 елдан бирле 1 номерлы мәктәптә эшләп килә. Анда төп фәннәрдән тыш ату, ут, тактик әзерлек буенча  дәресләр үткәрелә. Әлеге сыйныфны 150гә якын кадет тәмамлады. Егетләрнең һәрберсе армия сафларына үзләре теләп киткән, 3есе хәрби училищега укырга керде. Алар хезмәт иткән хәрби частьлардан, уку йорты җитәкчелегеннән мәктәп дирекциясе  исеменә рәхмәт хатлары еш килә. Тик соңгы елларда офицер булырга теләүчеләр саны азая. Радик Харис улы әйтүенчә, моның төп сәбәбе яшьләрне хәрби училищега керү конкурсының зур булуы куркытудан гыйбарәт. Хәрби булырга теләге көчле булганнарга комиссариат та ярдәм итәргә әзер. “Без патриотик тәрбия бирү генә түгел, хәрби һөнәргә мәхәббәт уяту өстендә дә эшләргә тиешбез. Моның өчен, әлбәттә, кадет сыйныфларының күбрәк булуы кирәк”, - ди комиссар. 

Профильле сыйныфлар тагын да бар. 5 номерлы мәктәптә милиция сыйныфы гамәлдә. Ул эчке эш-ләр бүлеге белән тыгыз мөнәсәбәттә эшли. Әле күптән түгел генә ТР Эчке эшләр министрлыгы үткәргән “Ирләр дуслыгы көннәре” акциясе кысаларында полиция хезмәткәрлә-ре укучылар белән очрашып, әңгәмә кордылар, истәлекле бүләкләр тапшырдылар. Узган ел  Р. З. Сәгъдиев исемендәге мәктәп базасында  “Яшь коткаручы” кадет сыйныфы оештырылды. Анда балалар янгын сүндерү, гадәттән тыш хәлләрдә үз-үзеңне тоту һәм беренче медицина ярдәме күрсәтү серләренә төшенәләр. 

Калган район мәктәпләрендә дә патриотик тәрбия үзәккә куелган. Ел саен 10 сыйныфта укучы ир балалар өчен традицион өйрәнү – кыр җыеннары үткәрелә. Сыйныф сәгатьләре, ачык дәресләр, туган ил, кеше гомере сагында торучылар белән очрашулар да ярдәм итә моңа.

Буа ветеринария техникумы базасында “Форпост” формированиесе актив эшләп килә. Алар районда узган барлык чараларда җәмәгатьчелек тәртибен саклауда үзләреннән зур өлеш кертәләр.