Лапта популярлашты

Якшәмбе көнне үзәк стадионда авыл районнарының ир-егетләре командалары арасында унынчы “Сәламәтлек” авыл спартакиадасы кысаларында мини-лапта буенча ТР чемпионаты узды.

Республика күләмендә икенче тапкыр үткәрелүче  әлеге иске яңа уенда Алексеевск, Балтач, Буа, Арча, Теләче, Саба, Биектау, Яшел Үзән командалары көч сынады. Буа данын 2010, 2012 елларда Татарстан җыелма командасы составында рус лаптасы буенча Бөтенроссия авыл җәйге уеннарында катнашкан Адав-Толымбайдан Марат һәм аның улы Эдуард Вәлиуллиннар, Альберт Саттаров һәм тагын Илнур Хөсниев, Татар Буасыннан Рәүф Йосыпов, шикәр заводыннан Василий Васин якладылар. Команда киеренке көрәштә өченче урын яулады. Икенчедә – Алексеевск, беренчедә Балтач уенчылары. 

– Лапта уены торган саен киңрәк колач җәя. Ул Мәскәү, Түбән Новгород, Ульяновск, Оренбург, Пенза өлкәләрендә, Удмуртия, Башкортостан республикаларында аеруча популяр. Татарстанда да әлеге уенга тартылучы командалар саны арта, - ди Татарстанның “Уңыш” физкультура-спорт җәмгыяте рәисе, бүгенге  бәйгенең баш хөкемдары Видади Мәхмүдов.

Россия лапта федерациясе 2007 елда теркәлгән. Аның максаты әлеге уенны кабат масса төсендәгегә әверелдерү. Мини-лапта ярышы кагыйдәләре, аны кечкенә мәйданнарда, комда, ябык биналарда уйнау мөм-кинлеген күздә тотып, рус лаптасы нигезендә эшләнгән. Оригиналыннан аермалы буларак, мини-лаптаның уен мәйданы кечерәк – 20х35 метрга тиң, тупны уенга кертү өчен аңа агач лапта ягъни аткы (бита) белән баш артыннан гына сугарга ярый. Уенның кагыйдәләренә килгәндә, анда бишәр кешедән торган ике команда уйный. Берсе – сакланучысы уен кырында, икенчесе – һөҗүм итүчесе шәһәр сызыгында тора. Һөҗүм итүчеләр тупка аткы белән сукканнан соң кыр аша чабып чыгарга тырышсалар, сакланучыларга тупны тотып алып кырда булган һөҗүм итүчеләргә тидерергә кирәк. Кыр аша чабып чыга һәм  үз урынына кайта алган уенчы командага 2 очко, сакланучылардан тупны җиргә төшкәнче тотып алучы 1 очко китерә. Уен 15әр минутлык дүрт таймнан тора. Күбрәк очко җыйган команда җиңә.