Чуаш Киштәгендә авыл Советы бинасы ачылды
Ул авыл җирлекләре башкарма комитетлары биналарын капиталь төзекләндерү программасы буенча яңартылды. Чуаш Киштәге авылы халкының шатлыгын муниципаль район башлыгы Марат Җаббаров,
Татарстан Республикасы Дәүләт Советы депутаты Ринат Гайзатуллин да уртаклаштылар. Авыл җирлеге башлыгы Иван Павлов яшәүчеләр исеменнән җитәкчеләргә һәм бинага капиталь ремонт үткәргән “СтройГарант” төзүчеләренә рәхмәтен җиткерде. Әлеге бинада почта бүлекчәсе һәм полициянең участок вәкиле бүләмәсе дә урын алган. Алар бу авылда яшәүче 650дән күбрәк кешегә хезмәт күрсәтәләр.
Марат Җаббаров әйтүенчә, капиталь төзекләндерү эше алга таба да дәвам итәчәк. Өч елда барлыгы өч авыл җирлеге бинасы ремонтланган.
Соңынан Һөнәр бәйрәмнәре уңаеннан театр бинасында узган тантаналы чарада катнаштылар, районның муниципаль хезмәткәрләрен район башлыгы Марат Жаббаров тәбрикләде. Марат Азатович дәүләт структурасының бер тармагы булган үзидарәләр хезмәткәрләре җилкәсендә җаваплылык һәм профессиональлек ятуын ассызыклады.
Иң активлар һәм алдынгылар Мактау Грамоталары һәм Рәхмәт хатлары белән бүләкләнделәр. Буа Дәүләт театры артистлары бәйрәм уңаеннан яңа премьера бүләк иттеләр.