Буада авыл хуҗалыгы җитештерүенең нәтиҗәлелеген арттыру турында сөйләшү булды
Бу темага багышланган семинар-киңәшмә мәдәни үсеш үзәгендә узды, анда Татарстан Республикасы Авыл хуҗалыгы һәм азык-төлек министры Марат Әхмәтов, аның урынбасарлары Илдус Габдрахманов, Нәҗип Хаҗипов, Идел аръягы районнары башлыклары, авыл хуҗалыгы һәм азык-төлек идарәләре башлыклары, эре авыл хуҗалыгы предприятиеләре җитәкчеләре, крестьян-фермер хуҗалыгы җитәкчеләре катнашты.
Киңәшмәне алып барган Марат Әхмәтов бу зонаны депрессив дип атады. Игенчелектә түбән күрсәткечләрне корылыкка гына бәйләргә ярамый, диде. Бер район чикләрендә хуҗалыклар арасында аерма шуның ачык мисалы. Аның сүзләренә караганда, күп нәрсә оста идарә итүгә бәйле.
- Әгәр дә Сез республика буенча уртача күрсәткеч дәрәҗәсендә эшләсәгез, без 4 миллион тонна чиген узар идек, - дип билгеләп үтте ул. - бу күрсәткеч буенча уртача күрсәткечтән югарырак булыр иде. Шулай ук хезмәт хакы түбән булган хуҗалыкларны да тәнкыйтьләде. Көзге культуралар буенча проблемалар бар, диде.
Илдус Габдрахманов, үсемлекчелек буенча тулы анализ ясап, Нәҗип Хаҗипов – терлекчелек буенча, проблемаларны яктыртып, аларны хәл итү, авыл хуҗалыгы җитештерүенең нәтиҗәлелеген арттыру юлларын күрсәтте, башка зоналарда уңай мисалларны билгеләп үтте.