Буада "Без бергә" халык иҗаты фестиваленә йомгак ясадылар.
Кичә, 29 март көнне Район мәдәният йортында Буа муниципаль районы башлыгының беренче урынбасары Илдар Еремеев, Башкарма комитет җитәкчесе Ранис Камартдинов, аның социаль мәсьәләләр буенча урынбасары Лилия Садретдинова катнашында «Без бергә» Республика балалар сәнгать фестиваленең муниципаль этабы гала – концерты булып узды. Шулай ук әлеге чара кысаларында мәдәният йортында «Россия сувенирлары» декоратив-гамәли эшләнмәләр күргәзмәсе оештырылды, анда мәктәп укучылары һәм укытучылары, шулай ук районның сәнгать мәктәпләре һәм мәктәптән тыш эшләр үзәге тәрбияләнүчеләре эшләре тәкъдим ителде.
Исегезгә төшерәбез, әлеге конкурс балаларда сәнгать-эстетик иҗатны үстерү һәм гомуммилли һәм этномәдәни кыйммәтләр нигезендә Россия халыкларының милли мәдәниятенә, традицияләренә хөрмәт тәрбияләү максатыннан үткәрелә.
Быел балалар сәнгать фестивалендә безнең районның 32 мәктәбеннән 400дән артык укучы катнашты. Алар берничә сайлап алу көне дәвамында 8 номинациядә үзләренең талантларын, шул исәптән "Хореография", "иҗади гаилә", "Мода театры", "Театр куелышы" һ.б. күрсәттеләр. Һәр мәктәп үз чыгышында илебезнең төрле халыкларының традицияләрен һәм гореф-гадәтләрен ачарга тырышты.
Бу көнне бәйрәм сәхнәсеннән «Без бергә» фестиваленең район туры җиңүчеләре исемнәре аталды. Бу безнең районның 15 катнашучысы һәм коллективы,аларга Буа муниципаль районы данын зона этабында якларга туры киләчәк. Аларга уңышлар телибез!
Чара «без – булдырабыз, без – бергә» финал җыры һәм флешмоб белән бергә тәмамланды.