"Микс " хореография коллективының тагын бер җиңүе

22 ноябрь 2019 ел., җомга

Шәһәрнең 1 номерлы балалар сәнгать мәктәбенең Юлия һәм Сергей Арцыбашевлар җитәкчелегендәге “Микс” хореография коллективының кече яшьтәгеләр төркеме Санкт- Петербургта узган “Талантлар салюты” халыкара проектыннан зур җиңү белән кайтты. Аларны мәктәп коллективы хлопушкалардан салют белән каршы алды.

Биючеләрнең бу беренче генә җиңүе түгел, әмма монысы иң мәртәбәлесе – фестивальнең тугызынчы йомгаклау суперфиналына ел дәвамында узган бәйгеләрдә беренче урыннарны гына яулаган коллективлар җыелган.

– Безне былтыр Бөек Устюгта “Суык бизәкләре” дигән халыкара конкурста җиңгәннән соң чакырганнар иде. Әле җәй айларында ук әти-әниләр белән киңәшләштек һәм барырга карар кылдык. Чыгыш ясау өчен “Бервакыт бакчада” дигән биюебезне сайлап, ике ай тырышып әзерләндек. Һәм менә аның нәтиҗәсе –  илнең төрле шәһәрләреннән, берничә чит илдән җыелган 73 коллектив арасында икенче урын алдык. Ә Айгөл Гафурова соло номинациясендә “Куыш” биюе белән өченче урынга лаек булды, – ди Юлия.

Биючеләрне Россия Федерациясенең атказанган мәдәният хезмәткәрләреннән, Зур театр, Мариинский театры осталарыннан торган мәртәбәле жюри җентекле бәяләгән. Алар каршында бар яктан да – биюнең куелышы, сәхнә костюмнары, башкару осталыклары һәм физик әзерлекләре белән сынатмаган яшь буалылар Санкт-Петербургның “Октябрьский” зур концерт залында гала-концертта чыгыш ясаганнар.  Төньяк башкалага сәяхәтләре искиткеч экскурсияләр, балалар гына түгел укытучылар, озата барган әти-әниләр өчен дә төрле мастер-класслар, форумнар белән дә истә калачак.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International