Рөстәм Миңнеханов районның авыл җирлекләре башлыкларына яңа автомобиль ачкычлары тапшырды
Бүген, 19 декабрьдә, Татарстан Республикасы Дәүләт Советы каршындагы мәйданда, «Татарстан Республикасы Муниципаль берәмлекләре советы» ассоциациясе тарафыннан оештырылган муниципаль берәмлекләр арасында республика смотр-конкурсында җиңүчеләрне тантаналы бүләкләү булды.
Тантаналы чарада Буа муниципаль районы башлыгы вазыйфаларын башкаручы Рәнис Камартдинов җитәкчелегендәге делегация катнашты. Безнең районның өч авыл җирлеге башлыклары смотр-конкурста җиңү яулап, республика Президенты Рөстәм Миңнеханов кулыннан Chevrolet «Niva» маркалы яңа автомобиль ачкычларын алдылар. Алар - Янтуган авыл җирлеге башлыгы Рамил Җамалетдинов, Кыят авыл җирлеге башлыгы Елена Корунова һәм Иске Тинчәле авыл җирлеге башлыгы Гөлия Шакирова.
Котлыйбыз һәм аларга эшләрендә яңа уңышлар телибез!