Безгә 50 – яшьнәр чагыбыз

Шикәр заводы эшли башлап, шәһәр үскән, киңәйгән чорда яңа микрорайон халкының социаль заказы буенча ачылган 1 номерлы мәктәпкә – 50 яшь. Үткәннәргә нәтиҗә ясап, бүгенгене барлар чагыбыз.

Сигезьеллык булып ачылган уку йортына беренче елны 288 бала килә, ә инде берничә елдан – узган гасырның 60нчы еллары ахырында ул уньеллыка әверелә, ике янкорма төзелә. Укучылар саны елдан-ел арта. 80нче еллар ахырында-90нчы еллар башында 1200гә кадәр укучы белем ала биредә. Укуларны хәтта өчәр сменада оештырырга туры килә. 50 ел эчендә мәктәпне 2,5 мең укучы тәмамлады. Бүген дә 535 укучы белем алучы мәктәбебез районда иң эре уку йортларының берсе. Соңгы өч ел эчендә үсеш динамикасы күзәтелә. Быелгы уку елында мәктәп коллективына 53 беренче сыйныф укучысы килеп кушылды.

Педагоглар коллективы мәктәпнең ветеран укытучылары – Россия Федерациясенең атказанган укытучысы Г. Нәҗмиева, Татарстан Республикасының атказанган укытучылары Л. Макарова, беренче директор А. Волков, Мәгариф отличниклары В. Сәлахова, Ф. Хөснетдинова, М. Сабитова, Г. Михайлова һәм башка бик күпләр нигез салган иң яхшы традицияләр дәвам итә. Бүген хезмәт куючы мөгаллимнәребезнең яртысы диярлек шушы мәктәп чыгарылышы да. 7 укытучыбыз югары, 25е беренче категориягә ия, 4 педагог “Белем  бирүдәге казанышлары өчен” күкрәк билгесен йөртә, Н. Казакова, С. Победимская, Н. Андреева, И. Ханбиков, Р. Ефремова “Мәгариф”  өстенлекле илкүләм проектында җиңделәр, 10 укытучы республика күләмендә грантлар отты.

Мәктәбебез гомуми белем бирүче уку йорты санала, әмма, әти-әниләрнең һәм укучыларның теләкләрен исәпкә алып, шәхси-юнәлешле белем бирүне дә гамәлгә ашырабыз – югары сыйныфларда социаль-икътисади профильле сыйныфлар булдырылды, ә агымдагы елдан инглиз, рус телләрен, математиканы тирәнтен өйрәнү сыйныфлары гамәлдә. 2004 елның 1 сентябрендә ТР Министрлар Кабинеты Карары белән районда беренче кадет сыйныфы ачылды. Аларда өстәмә белем бирү системасы Ватанга тугрылык, хәрби белгечлек алу кирәклеген аңлау кебек сыйфатларны тәрбияләүгә, дисциплина булдыруга, сәламәтлекне саклауга юнәлтелгән.  Кадет сыйныфы укучылары “Аҗаган” хәрби-спорт уенының зона һәм республика этабында призлы урыннар яулап киләләр.

2008 елдан “Шәхси-юнәлешле белем бирү шартларында көндәшлеккә сәләтле шәхес формалаштыру” методик темасы өстендә эшлибез, төрле программаларны гамәлгә ашырабыз. Бу балаларның табигать биргән сәләтләрен ачуда, билгеле инде өстәмә белем бирү дә зур роль уйный. Бүгенге көндә 270тән күбрәк укучыны берләштергән 8 фәнни берләшмә эшләп килә. Мәктәбебезнең  матди-техник базасы заманча таләпләргә җавап бирә. Монда 2011 елда капиталь ремонт үткәрүнең дә роле зур булды.

Болар барысы да укучыларыбызның Бөтенроссия, халыкара, республика конкурс бәйгеләрендә, олимпиадаларында җиңү яулау мөмкинлеге бирә. Шундыйлардан Г. Камәрова, Д. Краснов, Э. Гарифуллина, Р. Сөнгатуллин, Н. Антонов, А. Нугаева, Э. Трусенева, А. Трусенев, Е. Смирнова, А. Кәримова, А. Хөснетдинова кебек укучыларыбызның, аларны әзерләгән укытучыларыбыз И.  Хизның, С. Победимскаяның, Л. Тюлютинаның,     Ф. Мөхәммәтҗанованың, Т. Князеваның, Г. Кәримуллинаның, Ф. Хәйретдинованың, хокук бозуларны кисәтү отряды җитәкчеләре Лилия һәм Рамил Кавиевларның исемнәрен мактап телгә аласым килә. 

Шулай ук төрле еллар чыгарылышлары, бүгенге көндә Буа районы прокуроры булып эшләүче Марс Фәтхуллин, Казан кооператив институты ректоры Илдар Насретдинов, җылылык челтәрләре директоры Виктор Мясников, Казан шәһәрендә типография директоры Илдар Нәфыйков, Буа типографиясе җитәкчесе Фәридә Гатауллина, төзелеш компанияләре генераль директорлары Илдус  Латыйпов, Сергей Никифоров, хирург-онколог Сергей Фомин, хирург Иван Егоров һәм башкалар да мәктәбебез горурлыгы.