Марат Җәббаров: сөт терлекчелегенә, сөт икътисадына мөнәсәбәтне үзгәртергә кирәк
Бүген ТР Премьер-министры урынбасары – ТР авыл хуҗалыгы һәм азык-төлек министры Марат Җәббаров эш визиты белән Югары Ослан районында булды. Аны район башлыгы Марат Зиатдинов озатып йөрде.
Сәфәр барышында Марат Җәббаров Ямбулат авылындагы «Заря» агрофирмасы эше белән танышты, ул терлекчелек, үсемлекчелек һәм җиләк-җимеш культуралары үстерү белән шөгыльләнә. Биредә 150 гектар мәйданда күпьеллык үсентеләр үстерелә, 1000 тоннага исәпләнгән җиләк-җимеш саклагычы төзелде. Агымдагы елда Татарстан Республикасы Авыл хуҗалыгы һәм азык-төлек министрлыгы ярдәме белән 11 га мәйданда алмагач бакчасын интенсив технология буенча утырту планлаштырыла. Хәзер мелиорация программалары буенча гидро-техник корылмалар төзелә. Тулы уңыш 4-5 елдан башланачак дип көтелә.
Карау барышында шулай ук предприятиенең машина-трактор паркының язгы кыр эшләренә әзерлеге 100% тан да билгеләп үтелде.
Аннары баланс комиссиясе составында Татарстан Республикасы Авыл хуҗалыгы һәм азык-төлек министрлыгы башлыгы Югары Ослан районы авыл хуҗалыгы җитештерүчеләренең 2020 елгы язгы кыр эшләрен үткәрүнең эш планнарын кабул итүдә катнашты.
"Районның киләчәге яңа алдынгы технологияләр кертүдә. Югары технологияле комплекслар төзү, терлек азыгы үзәкләре урнаштыру, көтүлекләр белән идарә итү, ашату белән идарә итү программалары булдыру зарур. Бу компонентта район күршеләреннән: Тәтеш, Буа, Апас һәм башка районнардан калыша», - дип билгеләп үтте Марат Җәббаров.
Вице-премьер «Заря» АФ ҖЧҖтә (2019 елда продуктивлылыгы – 3680 кг), «Югары Ослан» АФ ҖЧҖендә (продуктивлылыгы 2019 елда – 2837 кг), «КВ Агро» АҖендә (продуктивлылыгы 2019 елда – 5449 кг) зур булмаган резервлар булуын билгеләп үтте. Агрофирмаларны кадрлар белән тәэмин итү мәсьәләләре кискен тора.
«Агрофирма җитәкчелегенең сөт терлекчелегенә мөнәсәбәтен үзгәртергә вакыт. Сөт икътисадын нәкъ менә югары продуктивлылык аша тәэмин итәргә кирәк, ә бу бары тик оешкан төстә баланслы туклану аша гына мөмкин», - дип басым ясады министр.
Шулай ук Марат Җәббаров файдаланылмый торган җирләр милекчеләрен административ җаваплылыкка тарту буенча районда эшне көчәйтергә кушты.