Яңа автовокзал юл кырыенда ук

Узган дүшәмбедә “Семейный БУМ” сәүдә үзәге территориясендә ачылган яңа автовокзалдан беренче автобуслар маршрутка чыкты.

Шәһәр эчендә һәм авылларга йөрүче пассажир транспорты хәрәкәтендә соңгы елларда зур үзгәрешләр булды. Ләкин халык файдасына түгел. Пассажир ташу хезмәтенә шәхси эшмәкәр Таһир Газизов алынганнан соң эшләр уңай якка китте. Эшмәкәр автобуслар хәрәкәтен торгызу гына түгел, юлчыларга барлык уңайлыклары белән яңа автовокзал да бүләк итәргә уйлады. Ул шәһәрлеләргә дә, авыл халкына да чын мәгънәсендә Яңа ел бүләге булды.

Муниципаль район башлыгы Рафаэль Әбүзәров сәүдә үзәгенең бер бүлмәсен биләгән автовокзалны ачу тантанасы уңаеннан потенциаль пассажирларны һәм “Т. Газизов” шәхси предприятиесендә эшләүчеләрне тәбрик итте, эшләрендә уңышлар теләде. “Таһир Газизов  пассажир ташу эшенә авырлыклардан курыкмыйча, чын ир-егетләргә хас булганча кыю алынды. Сүзне тыңлаганы өчен аңа зур рәхмәт. Халык та яңа урынны яратыр, автобуслар расписаниесен кулай күрер”, - диде ул. Таһир Газизов үзе дә бүгенге, булачак пассажирларына автовокзалда гел уңай атмосфера булуын теләп, шәхси предприятиесенең эш планнары белән таныштырып үтте. Аның карамагындагы 19 автобусның 4есе шәһәрдә Вокзал – “Семейный БУМ” – Ефремов урамы маршруты буенча хәрәкәт итә, 5есе Буадан Казанга йөри. Җылы, уңайлы автобуслардан халык канәгать.

Ә элеккеге автовокзал ягында яшәүчеләр ара ерагайды, дип борчылмасыннар – маршрутка чыккан һәр автобус вокзалга кереп аннан пассажирлар утырта.

Ниһаять, автовокзал бүлмәсен күрү бәхете дә насыйп булды. Диварларга автобус  расписаниеләре эленгән. Анда да сөенечле яңалыклар бар – киләсе елдан Буа – Кырык Садак, Буа – Яңа Тинчәле, Буа – Ырыңгы, Буа – Килдураз, Буа – Аксу (Югары Лашчы авылына кереп), Буа – Иске Борындык (Әлши, Раково, Яскүл, Зур Боерган авылларына кереп) маршрутларын кабат ачу күздә тотыла. Кайбер маршрутларга Геннадий Барабанов җитәкчелегендәге автотранспорт предприятиесе дә хезмәт күрсәтәчәк. Автовокзал эчендә утыргычлар тезелгән, ана һәм бала бүлмәсе бар, касса, диспетчерлык бүлмәсе – барысы да заманча. Янәшәдә генә “Семейный БУМ” кафесы. Диспетчер Гөлшат Җамалетдинова һәм Альбина Газизова һәркемгә ачык йөз белән хезмәт күрсәтергә әзерләр.

Яңа автовокзалдан хәерле юллар сезгә!