Полиция Кыш бабае бүләк өләште

Яңа ел алдыннан полиция Кыш бабае бүләк тулы капчык күтәреп шәһәрдә һәм авыллардагы “авыр” гаиләләрдәге сабыйларга бәйрәм күчтәнәче өләште.

Балигъ булмаганнарның хокук бозуларын профилактикалау төркеме өлкән инспекторы Илнур Харисов Кыш бабай ролендә, социаль педагог Гүзәл Әюпова – Кар кызы – нәниләрнең көтеп алган кунаклары. Өстенә кызыл толып кигән, ак сакаллы, озын “тылсымлы” таягын тоткан, ә башында полиция бүреге булган Кыш бабайны ул гаиләләрдәге нәниләр ничә елдан бирле көтеп алалар. Ә быел “картлач” өчен гаиләләр үзләре дә күңелле сюрприз ясадылар: исерткеч белән мавыгырга яратучы әти-әниләрнең һәркайсы аеклар, өйләре җылы, җыештырылган, плитәдә тәмле исләр чыгарып ашлар пешә. Күренеп тора сабыйларның үзләренең дә шатлыклары эчләренә сыймый – матур итеп киенгәннәр, күпчелек очракта наз, яратудан мәхрүм иткән әниләре бүген аларны сөеп туя алмый, бу күренешкә инспектор – Кыш бабай үзе дә балалар сыман шатланды. “Безнең ел саен бу гаиләләрдә үткәргән профилактик эшебез юкка булмаган. Андыйларны “камчылау” ысулы белән түгел, ә аңлату, уртага салып сөйләшү ярдәмендә тәрбияләргә кирәк. Бары шул вакытта гына уңышка ирешеп була”, - ди ул.

Шәһәрнең Арефьев урамындагы 2 бала анасы С. Яңа ел кунакларына чын күңеленнән рәхмәт әйтте. “Әлеге мәкерле чирдән арынгач үзем дә рәхәтләнеп киттем. Балаларымны югалта яздым. Киңәшләрегез ярдәм итте”, - дип озатып калды. Шәһәрдәге башка йортларда да сабыйларның шатлыгын уртаклашудан тәм тапты Кыш бабай. Авыл җирендә яшәүчеләр дә зарыгып көтеп алдылар. Берсеннән-берсе тәмле күчтәнәчләр тутырылган бүләкләрне алгач нишләмәделәр генә сабыйлар: Кыш бабайга атап җырладылар, шигырьләр сөйләделәр, кайберләре хәтта биеде дә. 

Менә шулай күңелле генә бәйрәм күчтәнәчләре генә өләшергә ниятләгән Кыш бабайның Адав-Толымбай авылында яшәүче Н. ханымның өенә кергәч кәефе төште. Өч бала үстерүче ана, авырыйм, салкын тиде, дип акланса да, аек түгеллеге сизелә иде. Кыш бабай ананы акылына килергә өндәде. Ә тегесе Елан елында төзәлермен, дип вәгъдә бирде.

Кыш бабай һәм Кар кызы 27 гаиләдәге 50 балага Яңа ел күчтәнәче тапшырылу турында рапорт бирделәр.