Гармуннарга “икенче тормыш” бирә

Шәһәрдә яшәүче Рөстәм Әбүзәров гармуннарга “гомер” өсти, ул аларны үз куллары белән төзәтә.

“Әтием Хаҗиәхмәттән күчте бугай миңа музыкага мәхәббәт. Ул гармунда уйный иде, мин дә көйне “җыеп утыра” торгач, ярыйсы  гына моң чыгарырга өйрәндем”, - ди үзе. Өендә хромкасы, Тула, Саратов тальян гармуннары бар. Сәнгать мәктәбен тәмамлаган кызлары Гүзәл белән Гөлнараны гармун көе астында биетеп үстерде, дисәң дә була. 

Үзе җитәкләгән РОСТО (ДОСААФ) район оешмасында да Тула гармуны тора. Берәр хезмәттәшенең туган көне яки юбилее  уңаеннан тәбрикләүләргә гармун көе дә кушыла. Музыканың сихри көчкә ия икәнлеге һәркемгә мәгълүм. Әмма бер генә әйбер дә мәңгелек булмаган кебек, музыка кораллары да “картая”. Рөстәм үзе әйтүенчә, аккордеонда, баянда, төрле гармуннарда күп уйнаганлыктан төзексезлекләр барлыкка  килә. Үз куллары белән сак кына ачып, төзәтү эшендә музыканы ишетә белү сәләте булыша. “Минем эш коралларым – яссы табанлы кыскыч, эскәк, җилем, тимер кисәкләре”, - ди гармуннарга җан өрү остасы. Таныш-белешләргә дә бик ярап куя әле аның алтын куллары. Бөтен кеше дә гармунның “бакаларына” басканнан соң көй чыкмаса, аны төзәтү өчен Казанга я башка шәһәргә чыгып китә алмый. Җитмәсә, хәзерге көндә хромкалар олы яшьтәгеләрдә генә. Яшь-җилкенчәк арасында элеккечә гармун тартып авыл урамнарын иңләү сагынып сөйләргә генә калды. Шәһәрдә яшәүче Җиһангәрәй абыйның “Вятская” гармунының телләре “биеми” иде. Төзәткәннән соң пенсионер шатлыгын кая куярга белмәде. Рөстәм аңа моннан соң уен коралының сыйфатын югалтмас өчен дымлы урында сакламаска киңәш итте. Гармуннар үзләрен хөрмәт итүчеләрне генә якын күрә, бөтен байлыклары белән шуларга гына ачыла бит. Ә Ташкент якларыннан кайткан Абдулла бабайга хромкасының үз тавышын кайтарып, аны чиксез шатландырды. Шул рәвешле Рөстәм үзе дә музыканы дус күреп, кешеләргә дә хәленнән килгән кадәр ярдәм итеп яши. “Чанада утырып барырга яратсаң, аны тартырга да өйрәнергә туры килә. “Хоббием” кемгә дә булса кирәк булса, сөенәм генә”, - ди Рөстәм Хаҗиәхмәт улы.