Йөртүчеләргә мәдәнилек җитми

Узган ел районда 57 юл-транспорт һәлакәте теркәлде. Шуларның 3 автомобиль йөртү стажы 3 елдан артмаучылар гаебе аркасында килеп чыкты. Моннан нәтиҗә – автомәктәпләрдә укыту сыйфатын күтәрергә кирәк. 

Дүшәмбе көнне район ЮХИДИ бүлекчәсе бинасында узган киңәшмәдә сүз шул хакта барды. Анда Идел аръягы районнарындагы автомәктәпләр җитәкчеләре, укытучылары, инструкторлар катнашты. Чараны Буа ЮХИДИ бүлекчәсе начальнигы Равил Мөхәммәтбариев ачып җибәрде. Аның әйтүенчә, 2006-2012 елларга юл һәлакәтен киметүгә эшләүче  максаткан федераль дәүләт программасында күрсәтелгән бурычлар безнең районда ахыргача гамәлгә ашырылды. Моның төп дәлиле – алдагы еллар белән чагыштырганда ДТПларның кимүе. Җитәкче 2013-2020 елларга исәпләнгән яңа программа белән дә таныштырып үтте. Аның буенча 2020 елга юл һәлакәтләрендә каза күрүчеләр, үлүчеләр саны 25 процентка кимергә тиеш. Равил Мөхәммәтхан улы автомәктәпләр эшчәнлегендә җитешсезлекләр хакында да әйтеп үтте. Аның фикеренчә, аларда техника турында тулы мәгълүмат базасы юк, тәҗрибә өстендә аз эшлиләр, автодромнар тиешенчә җиһазланмаган. “Безнең автомобиль йөртүчеләргә мәдәнилек җитми. Югыйсә, бер-береңә юл бирү, гади генә юл хәрәкәте кагыйдәләрен үтәү авыр түгел бит”, - дип, чыгышын тәмамлады ул.

Аннан соң сүз бүлекчәнең теркәү-имтихан алу төркеменең өлкән дәүләт инспекторы Илдар Гыймалетдиновка бирелде. Ул да автомәктәпләр җитәкчеләре алдында җитешсезлекләрне бетерү бурычы куйды. Шулай ук ел буе инспекторлар тарафыннан куелган таләпләрне үтәп килгән, белемле, беренче тапкырдан ук имтихан тапшыручы курсантлары белән мактана алган автомәктәпләргә кубоклар һәм Мактау грамоталары тапшырды. Мондый бүләкләрне баштан гомуми рейтинг буенча беренче һәм икенче урыннарга чыккан апаслылар алса, безнең район да өлешсез калмады – “РОСТО” (ДОСААФ) автомәктәбе өченче призга ия булды.