Бер йорттан – өч терлекче

Каенлык авылында яшәүче Садыйковлар гаиләсе һәр көнне йокыдан бик иртә уяна. Ирле-хатынлы Зөфәр һәм Фәния, уллары Фәннур өчесе дә терлекчелектә хезмәт куялар чөнки.

Күп йортларда әле утлар да эленмәгәндә Фәния апа үзләрендәге фермага үгезләр карарга, ә ирләр шактый еракка – “Нива” агрофирмасының “Степановка” бүлекчәсенә юл алалар. Әти кеше анда  ферма мөдире, ә яшь егет ветеринария табибы булып эшлиләр. 20 километрдан күбрәк арада кайтып-китеп йөреп вакыт уздырмыйлар. Шуңа да кичкә кайвакыт ярты төнгә кадәр вакытлары биредә үтә. Сыерлар бозаулаган чорда бигрәк тә. Агрофирма җитәкчеләре, баш белгечләр Садыйковлар хезмәтеннән аеруча канәгать. “Аларга рәхмәттән башка сүз юк. Эшләрен яратып, белеп, чиста-пөхтә башкарулары, Зөфәр абый шуның өстенә бик төгәл булуы белән аерылып торалар. Ирешкәннәребездә бу гаиләнең өлеше саллы”, - ди директор Айрат Нугаев.

Бергә эшләсәләр дә, әтисенә аркалану Фәннурга хас түгел. Беренче чиратта алар коллегалар, бер максатка эшләүчеләр. Зөфәр абый үзенең юлын дәвам итеп ветеринария техникумын тәмамлаган улы, баш-ка яшьләр белән дә уртак тел таба белә, киңәшләрен җиткерә, өйрәтә. “Алар безнең киләчәгебез. Шөкер, авылда эшләргә теләүчеләр бар”, - ди ул. Үзе исә хезмәт юлын терлекчелек белән  1985 елда Каенлыкта баш ветеринария фельдшеры буларак бәйләгән иде. Аннан “Фролово” бүлекчәсендә эшләде, биш ай элек мөдир итеп билгеләп куйдылар. Бүген аның карамагында 342 баш мөгезле эре терлек, шул исәптән 150 савым сыеры исәпләнә. Узган ел аларның һәрберсеннән уртача 5200 килограмм сөт саудылар. Гыйнвар аенда гына да фермада 28 бозау алынды. Әтиле-уллы Садыйковлар, берләшеп, аларның үлеменә юл куймау, авыруларны булдырмау, күбрәк продукция җитештерү өчен тырышалар бүген.