Кабат беренчеләр

Күптән түгел Тәтеш шәһәрендә узган “КЭС БАСКЕТ” мәктәп баскетбол лигасы чемпионатының зона этабыннан Буа кызлары һәм егетләре 25 февральдә Аксубайда узачак финалга юллама алып кайттылар. 

Беренчелекне Идел аръягы зонасы районнарыннан җыелган иң көчле 8 команда дәгъвалады. Кызлардан Буа данын шәһәрнең 5 номерлы мәктәбенең Алсу Бәшировадан, Луиза Галимовадан, Яна Арефьевадан, Елизавета Ефремовадан, Ләйсән Заһидуллинадан, Ландыш Исмәгыйлевадан, Адилә Хөснетдиновадан, Кристина Поспековадан, Алия Хәбибуллинадан, Алия Билаловадан, Неля Әхмәтҗановадан, Лилия Җамалетдиновадан торган командасы яклады һәм икенче ел рәттән отты. “Бу безнең ныклы әзерлегебез, дус, бердәм булуыбыз, уенның соңгы секундына кадәр көрәшә белүебез белән бергә яраткан тренерларыбыз Илдус Җәләлетдиновның, Александр Кузьминның тырышлыгы, безгә ышанулары нәтиҗәсе дә. Шуңа алга таба да җиңүебезгә ышанабыз”, - диләр баскетболчы кызлар.

2 номерлы лицейның Рафаэль Сәйфетдинов шәкертләре Ренат Гомәровның, Артур Сафиуллинның, Денис Тарасовның, Фәнил Хәсәновның, Айрат Шәрәфетдиновның, Сергей Шульгачның, Айрат Җәләлетдиновның, Фәрит Садриевнең, Рамиль Вәлиевнең, Рөстәм Шәрәфетдиновның, Илфат Мөхетдиновның, Камил Сәйфетдиновның мондый бәйгедә беренче җиңүләре. Финалда да уңышлар телибез.