“Ана теле” проекты һәркемгә ачык

Республикада “Ана теле” татар телен дистанцияле өйрәтү буенча онлайн-мәктәбе ачылу беренче 10 мең файдаланучы алдында яңа ишекләр ачты, дисәң дә була. Әлеге укыту проекты нәрсәдән гыйбарәт соң?

Ул  ТР Президенты Рөстәм Миңнеханов  кушуы буенча һәм Татарстан Республикасының татар телен өйрәтү мәктәбен эшләү буенча EF Education First компаниясе белән килешүе кысаларында тормышка ашырыла башлады. Килешүгә узган елның августында ук имза салынган иде. Ә 1 февральдән татар теленә өйрәтү онлайн-мәктәбе файдаланучылары өчен беренче дәрәҗәнең беренче бүлеге – башлаучылар өчен элементар дәрәҗә ачык булды. Алга таба проектны тулыландыру процессы тизләтеләчәк.  

ТР Мәгариф һәм фән министры Энгель Фәттахов хәбәр итүенчә, әлеге программа мөмкинлекләреннән файдалану Россиядә һәм аннан читтә яшәүче һәм татар телен өйрәнергә теләүче һәркем өчен түләүсез. Моның өчен сайтта теркәлергә генә кирәк. Программада татарчага өйрәтү дәресләре, грамматиканы үзләштерү өчен аудио-видеофильмнар һәм сөйләм практикасы бирелә. 

“Балага туган телне ана сөте белән кертүне һәр ата-ананың бурычы саныйм. Күбесе өчен ул-кызының туган телдән битәр инглизчәне, русчаны камил белүе мөһим. Туган телен яхшы белүче чит телне дә тиз үзләштерәчәк, югыйсә. Халыкара туган тел көне газиз телебезгә әһәмият бирү өчен булдырылган”, - ди район мәгълүмати-методик үзәк методисты Лилия Гайнуллина. Аның белдерүенчә, “Ана теле” проектын эшләүдә республиканың иң оста, танылган укытучылары, галим-галимәләре, лингвистлары, фәннәр докторлары катнашты. Эшче төркемне филология фәннәре докторы Фәнүзә Тарасова җитәкләде. Тугыз дәрәҗәдәге программаның кызыксынучылар өчен файдасы зур булырга тиеш. Төрле темаларга төшерелгән мавыктыргыч фильмнар, аудиоязмалар, фоторәсемнәр һәм башкалар укуны кызыклы итә һәм татар телен үзләштерүне дә җиңеләйтә.

Энгель Фәттахов “Ана теле” проектының тормышка ашырылуын республикабыз өчен генә түгел, бәлки бөтен Россия өчен дә зур вакыйга булуын, дистанцияле укытуның Татарстаннан читтә яшәгән милләттәшләребез өчен туган телләрен өйрәнүдә мөмкинлекләр тудыруын билгеләп үтте. 2013 ел проект өчен старт алу елы булса, 2014 елның 1 гыйнварыннан ул тулы режимда эшли башлаячак.