Әфганстан әрни йөрәктә

Совет гаскәрләренең чикләнгән контингенты Әфганстаннан чыгарылуга 24 ел тулу, елдагыча, “әфганчы”ларны бергә җыйды.

Бүгенге көндә районда 129 сугышчы-интернационалчы исәпләнә. Очрашу һәлак булган сугышчан иптәшләре истәлегенә чәчәкләр һәм веноклар салудан башланып китте. Бер минут тынлык һәм очрашу тантана төсе алды. Район башкарма комитеты җитәкчесенең социаль мәсьәләләр буенча урынбасары Мөдәррис Гайфуллин һәлак булучыларның туганнарына, балаларына бүләкләр, чәчәк бәйләмнәре тапшырды, залда утыручыларга рәхмәтен белдерде. Район хәрби комиссары Радик Төхфәтуллин да “әфганчы” сугышчыларның батырлыкларын бүгенге көн күзлегеннән бәяләде. Кызганычка каршы, аларның саннары елдан-ел кими. 28 кешене тыныч тормышта югалттык. Ырыңгы авылыннан Сергей Шурбин белән ведомстводан тыш сак бүлегенең үзәкләштерелгән сак пульты кизү торучысы Рәшит Шәрәфетдинов кораллы дезертирлар кулыннан һәлак булдылар. 

Ун ел дәвам иткән Әфган сугышында илебез зур югалтулар кичерде. Һәлак булучылар саны 26 меңгә җитүе турында мәгълүматлар китерелә. 40нчы армия командующие Б. Громов “Чикләнгән контингент” исемле китабында бу сугыш турында түбәндәгечә яза: “40нчы армиянең җиңелүе, шулай ук безнең Әфганстан сугышында хәрби җиңү яулавыбыз турындагы белдерүләр өчен нигез юклыгына мин тирәнтен инандым. 1979 елда Совет гаскәрләре каршылыксыз бу илгә керделәр һәм үз бурычларын үтәгәннән соң оешкан төстә кире кайттылар. Әгәр дә чикләнгән контингентның төп дошманнары сыйфатында оппозициянең кораллы отрядларын карасак, алар арасында аерманың 40нчы армиянең кирәк, дип табылган эшне башкаруын, ә дошманнарның нәрсә хәлләреннән килә – шуны үтәүләрен күрербез. Армия алдына берничә төп бурыч куелган иде. Беренче чиратта без Әфганстан хөкүмәтенә эчке сәяси хәлләрне көйләүдә ярдәм итәргә тиеш булдык. Безнең гарнизоннарга, аэродромнарга йөкләр ташу өчен файдаланылучы коммуникацияләргә һәм автомобиль колонналарына һөҗүмнәр булдырмас өчен генә хөкүмәт гаскәрләре белән берлектә хәрби операцияләр үткәрдек”.

Кичәдә “әфганчы”лар советы рәисе Ренат Хәсәнов урынбасары итеп Илгиз Төхфәтуллин сайланды. Р. Хәсәнов Р. Хәйретдинов белән Р.Шамионовка Сугышчан хәрәкәтләр ветераны ордены тапшырды. Ветераннарның район советы рәисе Николай Дементьев бу сугышта катнашучыларга рәхмәт белдерде, изге теләкләрен ирештерде. 

Берничә көн элек Ял үзәге бинасында М. Вахитов исемендәге гимназиянең 8-11 сыйныф укучылары һәм “әфганчы”лар катнашында “Батырлык дәресләре” үткәрелгән иде. Радик Төхфәтуллин, Илгиз Төхфәтуллин, Ренат Хәсәнов, Вазыйх Абдрахманов үзләренең истәлекләрен балалар белән уртаклаштылар. Завуч Гөлфия Корбанова җитәкчелегендәге укучылар батыр йөрәкле абыйларына байтак сораулар яудырдылар. Ахырдан “Кандагар” фильмын карадылар.