Әбиләр пәрдә тегә

Буада туып-үскән, хәзерге вакытта Казан шәһәрендә яшәүче эшмәкәр Рамилә Галиуллина картлар һәм инвалидлар өчен интернат-йортта күптән түгел ачылган хезмәт терапиясе бүлмәсенә аяк белән тегү машинасы һәм төрле тукымалар китерде. Әбиләргә эш җитәрлек хәзер. Алар әлеге бүләк итеп биргән тукымадан бүләк тегү машинасында берсеннән-берсе матур пәрдәләр, чаршаулар тегәләр. Арада берсе – сигезенче дистәне ваклаучы Зинаида Исаева аеруча оста куллы, ул пәрдәләрне бизәгеч ламбрекеннар ясарга да булдыра. 

Рамилә үзе һөнәре буенча тегүче, иренмичә, эше серләренә өлкәннәрне дә килеп өйрәтә. Мондый “мастер-класслар”дан соң хезмәт терапиясе бүлмәсенең хуҗалары катлаулырак әйберләр тегәргә дә уйлыйлар. Кыскасы, Рамилә күчтәнәченә алар бик шат – кирәкле дә, файдалы да шөгыльле итте ул әбиләрне.