Кечкенә кызда зур көч

“Батыр” спорт мәктәбеннән Виолетта Вәлиуллина бер ай эчендә дзюдо буенча ике зур җиңү яулады. Гыйнвар ахырында 1999-2000 елларда туган ир балалар һәм кызлар арасында Казанда узган ТР Беренчелегендә 32 килограммга кадәр үлчәү авырлыгында икенче булды. Февральдә Яр Чаллыда үткәрелгән җыеннардан соң Самарага, Идел буе Федераль округы бәйгесенә юл алды. Монда да яшь спортчы Татарстан җыелма командасы составында икенче баскычка күтәрелде. Адав-Толымбай урта мәктәбенең 5 сыйныф укучысы, IVкю кызгылт-сары билбау иясе Виолетта бүген тагын да җитдирәк бәйгегә – 22 мартта Анапа шәһәрендә узачак Россия чемпионатына әзерләнә. Тренеры – әнисе Альбина Вәлиуллина белән көн саен 

1,5-2 сәгать күнегүләр үткәрәләр. Җыеннарга да барачак. “Уңышларыма, бигрәк тә аларга әнием кул астында ирешүемә бик шатмын”, - ди ул. Үзен иң көчле гүзәл затларның берсе итеп таныткан Виолеттадан тагын җиңүләр көтеп калабыз.