Бигрәк оста хезмәткәрләр

Авыл җирлекләре секретарьлары халыкның гозерләрен тыңлап, хәл итеп, тау-тау кәгазь документлар тутырып, аралап, төрле тантаналар оештырып кына калмыйлар, үзләре дә чын иҗат кешеләре икән бит. Бу сәләтләрен алар Халыкара хатын-кызлар көне уңаеннан ЗАГС бүлегендә үткәрелгән “Ягез әле, хезмәткәрләр!” конкурсында “ачып салдылар”.

Җәмгыятьтә һәм гаиләдә ана ролен пропагандалауга, гаилә традицияләрен саклауга, талантлы, иҗади эшләүче секретарьларны ачыклауга һәм аларга ярдәм итүгә, һөнәри осталыкларын камилләштерүгә, алдынгы тәҗрибәне таратуга багышланган әлеге чара муниципаль район башлыгы урынбасары Валерий Егоровның  бәйрәм котлавыннан башланып китте. Сергей Восканян “Букет” җырын сузуга залга велосипедта бер кәрҗин чәчәкләр белән  кечкенә Кәрим килеп керде. Аңа апаларга чәчәкләр өләшергә ир-ат авыл җирлекләре  башлыклары булышты.

Хезмәтчелек ветераны Гөлфия Сафина, ЗАГС бүлеге начальнигы Гөлназ Хәкимова ирештергән котлаулардан соң ярышларга старт бирелде. “Яз”, “Чәчкәләр”, “Кырмыскалар” командаларына бүленгән секретарьлар – Адав-Толымбайдан Айгөл Хөсниева, Алшихтан Елена Тихонова, Бик-Үтидән Руфия Гыйззәтова, Зур Фроловодан Вера Антипова, Боерганнан Ирина Малышева, Кыяттан Резеда Фәйзуллова, Яңа Тинчәледән Ләйсәния Мифтахетдинова, Норлаттан Гөлнара Хөснетдинова, Ырыңгыдан Светлана Баскакова, Кырык Садактан Флера Миңнегалиева, Иске Суыксудан Рәмзия Әхсәнова, Иске Тинчәледән Лилия Сафина, Тимбайдан Светлана Тюплина, Килдураздан Айгөл Галәветдинова, Яшевкадан Наталья Тиханова алып баручы Рөстәм Әхмәдуллов бәйгене игълан итүгә бер-берсен уздыра-уздыра командалары эмблемаларын яклап, девизларын әйттеләр, җыр башкардылар, канатлы сүзләр әйттеләр, бишек җырлары башкардылар, үзләре пешереп килгән милли ризыкларны мактадылар, рецептлары белән бүлештеләр. Алгарак китеп әйтәм: соңыннан барысы бергә алар белән тәмләп чәй эчтеләр. Әле тагын төп эшләрендә кирәк булган туй, юбилей даталарын искә төшерергә, документлар тутыру буенча җаваплар бирергә, төрле тантаналар үткәрергә дә туры килде. “Тән язып” төрле халык биюләрен дә биеделәр. Ярдәмгә залда утыручы ир-атлар да килде. Иң авыры иң гади конкурс – йөрәк формасында пазллар җыю булды. Хәер, монда да югалып калмады секретарьлар. Әнә, Ләйсәния: “Безнең эшебез кәгазь йөрәкләр ябыштыру түгел, ә чын йөрәкләрне кавыштыру”, - дип, тапкыр сүзгә осталыгын күрсәтте.

В. Егоров җитәкчелегендәге жюри соңгы нәтиҗәне чыгарган арада С. Восканян, Ленар Салихов җырладылар. Район башкарма комитеты җитәкчесенең социаль мәсьәләләр буенча урынбасары Мөдәррис Гайфуллинның  “Эх сез, матур кызлар” җыры да алкышларга күмелде.

Һәр өч команда да бертигез баллар җыйды. Моның белән  һәркем килеште. Ә һәр катнашучы төрле номинацияләр буенча җиңүче, дип табылды һәм бүләкләнде. Авыл җирлекләре башлыклары да бүләкләр әзерләгән иде.

Барысы да яхшы кәеф, уңай тәэсирләр алып,  мондый кичәне киләчәктә кабат үткәрергә кирәк, дигән фикердә калып таралыштылар.