Гүзәлнең эше дә гүзәл

Шәһәрнең лицей-интернатында белем алучы балалар агымдагы уку елында татар теле һәм әдәбияты буенча олимпиадаларда “бер кочак” җиңү яуладылар. Ә 9 сыйныфтан Гүзәл Вәлиева рус мәктәбендә укучы татар телле балалар арасында татар теленнән республика күләмендәгесендә абсолют җиңүче булды.

Әдәбият буенча район олимпиадасында ул икенче урын алды. Гүзәл шулай ук төрле инша, шигырьне сәнгатьле уку конкурсларында, конференцияләрдә актив катнаша, җиңүләргә ирешә. Бүген күпчелек яшьтәшләре Интернетта аралашканда, кулына китап алуны хуп күрә. “Бу минем иң яраткан шөгылем. Төрле авторлар китапларын укыйм. Күңелемә аеруча якыннары – Муса Җәлил һәм Фәнис Яруллин әсәрләре”, - ди үзе.

Гуманитар фәннәргә генә өстенлек бирә, дияргә ашыкмагыз, башкаларын да җиңел үзләштерә беренче сыйныфтан алып гел “5”ле билгесенә генә өлгерүче кыз. Быел, әнә, физика һәм химия фәннәре буенча Казан милли-тикшеренү технология университеты уздырган олимпиадаларда икенче булды. Спортта да көчле, төгәлрәге җитез ул. Җиңел атлетика ярышларында мәктәп командасы составында чыгыш ясый, уңышлары да хәйран гына. Үтә тыйнак, сабыр холыклы, сөйкемле бу кызда шулкадәр үҗәтлек, омтылыш, ихтыяр көче булуы, күп нәрсәгә өлгерә һәм барысын да җиренә җиткереп башкара алуы соклану уята. 

Гүзәл Каенлык авылы кызы. Бирегә, үзләрендә башлангыч мәктәп кенә калдырылгач, 6 сыйныфка килде. Үзе кебек үк тырыш, сәләтле энесе Илфат белән әбиләре янында торып укыйлар. “Гүзәл таләпчән, тирән фикер йөртә, кыенлыкларны җиңә белүче, көндәшлеккә сәләтле, нык характерлы укучы”, -  ди аның турында укытучысы Гөлназ Зыятдинова. Җиңүгә табигать биргән сәләте өстенә шушы сыйфатлары китерә дә инде. Ә гыйлем эстәүне борынгылар юкка гына инә белән кое казуга тиңләмәгәннәр. Олимпиадаларга әзерләнгәндә күпме китап-белешмә, энциклопедия укылганын, эзләнүләргә, тел һәм әдәбият яңалыклары белән танышуга никадәр вакыт сарыф ителгәнен укучы белән укытучы үзләре генә белә! Тырышлыклары бушка китмәде – Гүзәл, якын көндәшләрен 10 баллга артта калдырып, 100 мөмкинлектән бик югары – 86 балл туплады. Укудан тыш иншалар язарга бик яратучы кыз киләчәктә татар журналисты булырга хыяллана. Аның тирән эчтәлекле язмаларын газетабыз битләрендә дә күрергә телибез.

Калган укучыларның җиңүләренә килгәндә, Казан федераль университеты үткәргән төбәкара олимпиадада 11 сыйныфтан Айгөл Сәгъдиева, 10нчыдан Фәнис Җиһаншин, Алинә Җәләлова икенче, 11 сыйныфта укучы Ландыш Бакирова, 10 сыйныфтан Ләйлә Хәбибуллина өченче урын алып кайттылар. Былтыр да җиңүчеләр арасында иделәр.

Алар барысы да татар теле һәм  әдәбияты буенча район олимпиадасында призлы урыннар алдылар. Ландыш, Фәнис, Ләйлә узган ел республика күләмендә призерлар булдылар. Алинә әле тагын әкиятләр, хикәяләр дә иҗат итә.