Туберкулез “баш күтәрүне” дәвам итә

24 март – Бөтендөнья туберкулезга каршы көрәш көнен күңелсез статистика белән каршылыйбыз – районда Кох таякчыклары йоктыручылар саны артканнан-арта бара. 

Үзәк дәваханә фтизиатры Сания Вәлиева әйтүенчә, агымдагы елның өч аенда гына тагын 6 кешегә әлеге диагноз куелды. Ә районда барлыгы107 кеше фтизиатрда исәптә тора. Артымның бер сәбәбе – флюорография тикшерүләренең активлаштырылуы. Тиздән бу процедура тагын да күбрәк халыкны колачлаячак. Дәваханәнең стационар флюорография кабинеты белән беррәттән аның мобиль төре дә эшли башлады. Ул авыллар буенча йөри. Бу хакта авыл фельдшеры алдагы көнне халыкка хәбәр итә. Бу өлкәннәр өчен бигрәк кулай булачак, чөнки аларның күбесе юл мәшәкатеннән курка, ә кайберләре мөмкинлеге була торып та, төрле сәбәпләр табып, флюорография узудан баш тарта. Шулай итеп “яшерен” авырулы әби яки бабай якыннары, оныклары өчен потенциаль чир таратучыга әверелергә мөмкин.

Сания Равиловна белдерүенчә, сабыйлар гомерен куркыныч астына куючы икенче төркем кешеләр – чит илдән күченеп кайтучылар. Алар балаларына Манту ясатудан баш тарталар. Сәбәбен, үзләре уйлап чыгарган ислам дине идеологиясенә таянып, ярамый, бала сәламәтлегенә зыян китерә, дип аңлаталар. Аның каравы сабыйларына рентгенография үткәрүгә теләп ризалашалар. Нәтиҗәдә, кечкенә бала нурланыш ала. Икенче яктан бу тикшерү чирне Манту реакциясе кебек ачыклап бирмәскә дә мөмкин, чөнки рентген сурәтендә үпкә генә күренә, ә туберкулез чире, чәч белән тырнактан башка, барлык органнарны да зарарларга сәләтле. Күз, умыртка баганасы, бөер, сөт бизләре, җенес системасы туберкулезы практикада еш очрый. Узган ел районда андый 3 кеше теркәлде. Түберкулез тикмәгә генә Бөтендөнья Сәламәтлек саклау оешмасы тарафыннан үлемгә китерүче иң хәтәр 10 авыру исемлегенә кертелмәгән.