Арендалы торак та булачак

Арендалы торак төзелеше ил күләмендә үстерелә. 2020 елга Россиядә андый торак фонды өлешен 10 процентка җиткерү бурычы куелды.

“Россия гражданнарына – үтемле һәм уңайлы торак” илкүләм проектын гамәлгә ашыруны контрольдә тоту буенча комиссиясе белән парламентның икътисад, инвестицияләр һәм эшмәкәрлек буенча комитетының берләштерелгән утырышында ТР Дәүләт торак фондының башкаручы директоры Тәлгать Абдуллин арендалы торакның 4 төрле вариантта төзелергә мөмкинлеге турында белдерде. Алар – “комфорт”, “стандарт”, “эконом”, “эконом +” классындагылар. Исеменнән аңлашылганча, “комфорт”ның уңайлыклары күбрәк, димәк кыйммәтрәк булуы белән аерылып тора. “стандарт” – социаль ипотека квартирасы, “эконом” – тулай торак, “эконом+” гостинка, ягъни кунакханә тибында булачак. 

“Татарстанда 2011-2016 елларда торак төзелешен үстерү” максатчан программасы кысаларында узган елда “Арендалы торак базарын үстерү” дигән ярдәмче программа да раслануы бу юнәлештә боз кузгалуын ачык сөйли”, - ди район Советының юридик бүлеге баш белгече Айрат Садыйков. Аның әйтүенчә, быел арендалы торак төзелеше планына Казанның Павлюхин урамында яшь белгечләр өчен 112 мең квадрат метр мәйдандагы күпфункцияле комплекс төзелеше кертелгән. Аның 60 мең квадрат метрын озак вакытлы арендага бирү планлаштырыла. Мондый тораклар социаль торакка чиратка эләкмәгәннәр өчен дә отышлы вариант булачак. Илнең төрле регионнарында зур инвестиция проектлары хәрәкәткә китерелә, читтән килеп, җитештерүдә хезмәт куючылар өчен дә яшәү урыннары таләп ителә. 

“Комфорт”, “стандарт” тибындагыларының 5-6 ел арендаланганнан соң сатуга куелуы да мөмкин. Хәзерге заманда торак белән бушлай тәэмин итү бетерелде. Аннан соң бөтен кешенең квартира сатып алырга акчасы да юк. Үзләренең квартираларын башкаларга биреп торучылар арасында алган керемнәреннән салым тү-ләргә ашыкмаучылар да очрый. 

Арендалы торак түбәле булырга теләүчеләр өчен дә уңайлы булачак, оешма-предприятиеләрнең вакытлыча эшләүчеләрне торак белән тәэмин итүдә мөмкинлекләрен дә арттырачак, дип ышанырга кирәк. 2014-2015 елларда мондый торак төзелеше барлык төбәкләрдә дә колач җәячәк. 

Районыбыз торак төзү буенча республикада алдынгы урынны тота. “Авылны үстерү”, “Яшь гаилә”, “Социаль ипотека” программалары уңышлы эшли. Быел соңгысы буенча шәһәрнең Яшьләр урамында 13 “А” адресы буенча 45 квартиралы йорт төзү планлаштырыла. Айрат Садыйков фикеренчә, арендалы торакка да сорау зур булачак.