Яшь инспекторлар үсә

Россиядә яшь юл хәрәкәте инспекторлары (ЮИД) хәрәкәте оешуга 40 ел тулды.

Ул 1973 елда СССР Эчке эшләр министрлыгының дәүләт автоинспекциясенең баш идарәсе инициативасы буенча оештырыла. Ел ахырына исә ил буенча 14 мең яшь юл хәрәкәте инспекторы исәпләнә. Шул вакыттан алар катнашында төрле республикаларда слетлар уза башлый. 1982 елда беренче тапкыр яшь велосипедчыларның Бөтенсоюз ярышлары була. Ул “Имин тәгәрмәч” исеме ала һәм аны Россиянең барлык өлкәлә-рендә дә уздыру традициягә әверелә. Әлеге бәйгедә Татарстанның ЮИД командасы тулы хокуклы катнашучы буларак 1986 елда тәүге тапкыр чыгыш ясый. Бераз соңрак яшь юл хәрәкәте инспекторлары отрядлары республиканың барлык районнарында да оештырыла.

“ТР БДД фәнни һәм белем бирү программаларын финанслау дирекциясе” дәүләт учреждениесенең Буа филиалы начальнигы Анна Сергудаева белдерүенчә, шәһәр һәм район мәктәпләрендә яшь инспекторларның барлыгы 400гә якын укучыны берләштергән агитбригадалары 1995 елда ук оешты. Алга таба балаларга юл йөрү кагыйдәләрен өйрәтү эше тагын да киңрәк колач алды. ЮИД түгәрәкләре оештыру, сыйныфтан тыш  сәгатьләр үткәрү белән бергә шәһәрнең  1 номерлы, Р. З. Сәгъдиев исемендәге мәктәпләрендә, лицей-интернатта автосыйныфлар ачылды. Быел Кыят урта мәктәбендә тагын бер шундый сыйныф оештырылды. Анда укучылар яшьтәшләре арасында юл йөрү кагыйдәләрен үтәүне пропагандалау өстенә, белемнәрен район һәм республика конкурсларында сыныйлар. Районның яшь юл хәрәкәте инспекторлары 18 ел рәттән “Имин тәгәрмәч” бәйгесендә катнашып, республиканың 10 иң көчле ЮИД командасы составына кертелде.