Су сынавын исән-имин узыйк

Язгы ташуның икенче “дулкыны” башланды – Зөя, Карлы елгаларында кабат су күтәрелде, Немчиновка, Килдураз авыллары янындагы күперләр янәдән су астында калды. Туң  китмәгәнгә җиргә сеңмәгән су урамнар буйлап, Көнбатыш бистәдәге әйләнеч юл өстеннән ага, ишегалларына, идән асларына тула. Көн саен район хакимиятенә, бердәм кизү тору-диспетчерлык хезмәтчелегенә, “Буа МППЖКХсы (инженерлык челтәрләре)” ачык акционерлык җәмгыятенә берничә дистә кеше ярдәм сорап мөрәҗәгать итә. Редакциягә шалтыратучылар да күп. “Буа МППЖКХсы” начальнигы Равил Сабирҗанов әйтүенчә, җәмгыятьнең берничә бригадасы ничәнче тәүлек инде хәл катлаулырак булган түбән урыннарда, ялгыз әби-бабайлар яшәүче йортлардан суны суырталар (һәркемгә ярдәм итү мөмкин түгел), тыгылган су торбаларын чистарталар. Аларга 111 номерлы янгын часте хезмәткәрләре, “Буа МСОсы”, “Дорсервис” чикләнгән җаваплылыклы җәмгыяте техникасы булыша. “Кайбер йорт хуҗаларының читтән ярдәм көтүе ризасызлык тудыра. Күп очракта кулга көрәк алып та суга юл-ны бикләргә булыр иде”, - ди Равил Нургали улы.