Иң яхшы тәрбияче – “Йолдызкай”да

Буа дәүләт драма театры бинасында  “Ел тәрбиячесе-2013” район конкурсы узды.

Традициягә әверелгән бәйгедә аның әзерлек этабында белем дәрәҗәсе, иҗади активлык, эшендә яңа алым һәм технологияләрне куллану буенча иң яхшы дип табылган җиде тәрбияче катнашты. Чара аларның үз-үзләрен тамашачыга тәкъдир итүләре белән башланып китте. Конкурсның бу өлешендә һәрберсе үз образын тудыруга иҗади якын килгән. ”Йолдызкай”дан А. Гурлина әбиләр, полициянең участок вәкилләре соравы буенча автобуста “килеп җитте”, “Ромашка”дан В. Вилданова “җен” сихере буенча чүлмәктән “чыкты”, ә “Әкият”тән Л. Хафизова галәмдә “барлыкка килде”. Әкият геройлары – Маша белән Аю “АБВГДЕЙКа” тәрбиячесе Г. Хәсәнованы “эзләп таптылар”, “Аленушка”дан О. Гришинаның һөнәри осталыгын “Модалы хөкем” телетапшыруында тикшерделәр. “Алтынчәч”тән Г. Шәмсетдинова һәм Ырыңгы балалар бакчасыннан И. Шурбина үзләре турында тәфсилләп шигырь сөйләделәр. Соңгысының конкурсның икенче этабындагы чыгышы тамашачыга бик ошады. Тәрбияче принцесса ролендә уйнап, “патша әтисеннән” балалар бакчасында эшләргә теләвен белдерде. Патша ничек кенә аның бу капризын үтәүгә каршы булса да, тегесе барыбер нәниләр белән эшләп карау теләгенә иреште. 

Калганнар да аңардан калышмадылар. Сәхнә дәртле җыр-биюләрдән “дер” селкенеп торды. Залдагылар сәгать ярымга сузылган күңелле тамашаның тәмамланганын сизми дә калдылар. Артистлыкта, үткен сүздә көч сынашкан тәрбиячеләр сәхнәгә чыгып тезелгәч, аларны тәбрикләү тантанасы башланып китте. Район мәгариф идарәсе начальнигы  И. Абзалов: “Сез бүген һәрберегездә үзегезне иҗади яктан ачтыгыз. Мондый белемле кадрлар эшләгәндә без балаларыбыз өчен тыныч”, – дип әйтеп узды. Аның бу изге теләкләренә мәгълүмати-методик үзәкнең баш белгече М. Глинкина да кушылды. Алар бергәләп бәйгенең төрле номинацияләрендә җиңгән тәрбиячеләргә – “Чишмә”дән Г. Рәхмәтуллинага, “Алтынчәч”тән Г. Шәмсетдиновага, “Күңелле ноталар”дан О. Назаровага, “Чуар тавык”тан И. Камалетдиновага, “Әкият”тән Л. Хафизовага, “Аленушка”дан О. Гришинага, “Ромашка”дан В. Вилдановага, “Кояшкай”дан Г. Сәйфетдиновага, Карлы балалар бакчасыннан Э. Хәмидуллинага Мактау грамоталары тапшырдылар. Балаларга юл йөрү кагыйдәләрен өйрәтүдә үзеннән зур өлеш керткән “Теремок” балалар бакчасы тәрбиячесе Э. Әхмәтҗановага “ТР БДД  фәнни һәм белем бирү программаларын финанслау дирекциясе” дәүләт учреждениесенең Буа филиалы начальнигы Анна Сергудаева махсус бүләк бирде. Аннан районның иң  көчле тәрбиячеләре исемлеген укыдылар. Мактаулы өченче урын “АБВГДЕЙКа”дан Г. Хәсәновага, икенчелек Ырыңгыдан И. Шурбинага бирелде. 

Ә “Ел тәрбиячесе” исемен “Йолдызкай”дан  А. Гурлина яулады. Бәйгенең узган елгы җиңүчесе “Әкият” балалар бакчасы тәрбиячесе Г. Сәгыйтова факелны аңа тапшырды.

Яңа “пешкән” җиңүче ел дәвамында әлеге исемне аклап, тырышып, үрнәк булып эшләргә сүз бирде.