Абитуриент, ГТО күрсәткечләрең ничек?

Киләсе уку елыннан илдә 1931 елдан алып 60 ел гамәлдә булган хезмәткә һәм оборонага әзер булу (ГТО) комплексын кабат мәктәпләргә кертергә мөмкиннәр.

Осоавиахимның Үзәк Комитеты 1932 елда үзен яхшы яктан күрсәткән кызылармиячеләрне “Ворошилов укчысы” исеме һәм күкрәк билгесе белән бүләкли башлады. Тора-бара төз атучылар әзерләү оборона-масса эшенең аерылгысыз өлешенә әверелде һәм яшьләр дә, өлкәннәр дә бу хәрәкәткә актив кушылдылар. Быелның март аенда РФ Мәгариф һәм фән министры Дмитрий Ливанов “Эхо Москвы” радиосына биргән интервьюсында югары уку йортларына укырга кергәндә абитуриентларның ГТО нормативларын ни дәрәҗәдә уңышлы тапшыруы исәпкә алыначагы турында белдерде. Ягъни, бердәм дәүләт имтиханнары, ГИА нәтиҗәләренә игътибар иткән кебек. “Барлык балаларга да тигез таләп куярга ярамый. Безгә һәр баланың сәламәтлеге торышындагы үзгәреш динамикасын күрү мөһим”, - диде министр. РФ Президенты Владимир Путин да март аенда спортка багышланган киңәшмәдә ГТО нормативларын кертүне хуплады. Физкультура укытучыларының район методик берләшмәсе җитәкчесе Илгиз Хәйруллин (рәсемдә) йөгерү, озынлыкка һәм биеклеккә сикерү, чаңгыда йөрү, граната ату, гимнастика күнегүләре, йөзү кебек спорт төрләре кергән ГТО нормаларын тапшыруны кертүне кирәк, дип саный. “Үткән пәнҗешәмбе көнне Ырыңгы мәктәбендә физкультура укытучылары семинарында бу хакта сүз алып бардык. Барысы да яңалыкны куллануга алуга риза. Хәзерге вакытта балаларның күп вакытларын компьютер, телевизор алдында үткәрүләре сер түгел. Хәтта авылда да әлләни физик эш юк. Хәрәкәт җитми. Яшь буынның сәламәтлеге мактанырлык түгел. ГТО нормаларын тапшыру кертелсә спортка мөнәсәбәт тә үзгәрер иде”, - ди Илгиз Газизҗан улы.

Район мәгариф  идарәсе начальнигы Илнар Абзалов та яңалыкның уңай ягы булыр, дип исәпли. “ГТО нормативларын тапшыру бурычы алда торганлыктан, балалар физкультура дәресенә теләп йөрерләр, дип ышанам. Спорт ихтыяр көче дә тәрбияли”, - ди ул. Әлбәттә, бөтен кеше дә рекордлы нәтиҗәләр күрсәтә алмый. Сүз укучыларның гомуми сәламәтлекләрен ныгыту турында бара. ГТО нормативларын тапшыру үз өлешен кертми калмас.

Дмитрий Ливанов бу мәсьәлә буенча май аенда зур сөйләшү булачагын белдерде. “Мәсьәлә август аенда хәл ителеп, 2014 елда югары уку йортларына нинди күрсәткечләр белән кабул ителәчәкләре билгеле булачак”, - диде.