Бакчаларга чиратлар үсә

Балалар саны үсү район өчен куанычлы хәл. Сабыйларны җитәрлек күләмдә бакчалар белән тәэмин итү мәсьәләсен генә тулысынча хәл итәсе бар.

Районда 2012 елда  517, быелның беренче кварталында 128 бала тәүге авазын салды. Сүз дә юк, балалар күп туа. Аларны балалар бакчаларына бирү вакыты җиткәнне сизми дә каласың. Авыллардан аермалы буларак, шәһәрдәге мәктәпкәчә яшьтәге балалар учреждениеләрендә сабыйлар өчен урыннар җитми. Бүгенге көндә шәһәрдә 3тән алып 7 яшькәчә булган 46, яшь ярымнан алып 3 яшенә кадәр 321 бала бакчага чиратта тора. “Теремок”та, “Йолдызкай”да бигрәк тә тыгыз. Бакча “даулау” өчен баланы урнаштыруга гаризаның вакытында бирелүе таләп ителә. Чөнки бакчага кабул итү чират буенча бара. Районның мәгълүмати-методик үзәге методисты,  Мария Глинкина әйтүенчә, ата-аналарга әлеге  гаризаны район мәгариф идарәсенә китереп бирүнең хаҗәте юк, моның өчен https://uslugi.tatar.ru/cei/feedback электрон адресы  һәм 3–26–02, 3–54–88 телефон номерлары буенча техник булышу хезмәте аша  җибәрү дә җитә. 

Кызганычка каршы, өч ел элек “Барс.Web-Электрон Балалар Бакчасы” системасы гамәлгә керүгә карамастан, ата-аналар әлеге яңалыктан файдаланырга ашыкмый. 2012 елда бакчаларда урын бирүне үтенеп мөрәҗәгать иткән 350 ата-ананың бары тик  10сы, быел исә 150 кешенең 8е генә портал аша эш иткән. Балалар бакчалары  мөдирләре дә бу хакта аңлату эшләре алып баралар. Югыйсә, яңа система мәктәпкәчә яшьтәге балалар учреждениеләре белән идарә итү процессларын автоматлаштыра һәм аларны компьютерлаштыруның мөһим инструменты булып тора. Ул мәгариф идарәсе органнары, балалар бакчалары мөдирләре, гариза бирүчеләр өчен билгеләнгән дә инде. Балалар бакчалары мөдирләре, мәсәлән, гаризаларны электрон вариантта алган очракта бакчалардагы төркемнәрне формалаштыра ала, әйтик, учреждениедә күпме бала булуын, күпме баланың килергә теләвен, ничәсенең мәктәпкә озатылуын, яшәү урынының адресы үзгәрүен, электрон чиратның баруын һәм бала өчен урыннар барлыкка килүен ачык белеп тора. Яңалыктан файдалануның ата-ана өчен уңайлы ягының берсе – учреждениегә чиратның күз алдында булуы. Монда балаларны бакчага төрле әйләнеч юллар аша бирүнең кирәге бөтенләй дә калмый. Гаиләнең башка шәһәргә күченеп китүе, я булмаса шәһәрнең икенче ягыннан йорт, квартира алу кебек үзгәрешләр дә ачыклык таба монда. Электрон чиратны өйдә күзәтеп барганда бакчада шул сәбәпле көтелмәгәндә урынлы булып куюың да бик мөмкин. Бакчага бару өчен юллама бирелгән очракта 30 көн дәвамында баланы китермәсәләр, статус “бала килмәде” дип үзгәртелә.