Кубок Буада калды

Татар-башкорт милли көрәше буенча муниципаль район башлыгы кубогына һәм призларына һәм Россия спорт остасы Фәрит Козырев призларына ачык шәхси команда республика ярышлары үткән шимбәдә “Батыр” спорт мәктәбендә бик киеренке узды.

Ярышлар башланыр алдыннан муниципаль район башлыгы Азат Айзатуллов көрәшчеләрне тәбрик итеп, аларга җылы теләкләрен ирештерде. “Унике ел элек башланып киткән әлеге ярышларны үткәрү традициягә керде. Дәвамлы булсын. Яшьтән көрәшеп үскән кеше тормыштагы авырлыкларны җиңел кичерә. Аның өчен хәрби хезмәт тә авыр тоелмый. Көрәшчеләребезнең республика күләмендә дә танылуларын телим”, - диде ул һәм Фоат Козыревка Рәхмәт хаты һәм кыйммәтле бүләк тапшырды. Хәзерге көндә Чүпрәле районының Иске Шәйморза авылында яшәүче 80 килограммга кадәр авырлык үлчәвендә Россия чемпионы исемен яулаган Фоат абый Козырев буалыларның үзенә булган хөрмәте өчен рәхмәт белдерде, “Азат Касыйм улының бүген беренче эш көне. Аңа эшендә зур уңышлар, нык сәламәтлек телим”, - диде. Саба районыннан килгән тренер Илдар Ермолаев Фоат абыйны туган көне белән тәбрик итеп, бүләк тапшырды. Бу вакытка Казаннан “ТАИФ” җәмгыяте директорлар советы рәисе Рөстәм Султиевның Фоат абыйга атап җибәргән бүләге – телевизорны да китереп җиткерделәр. “Батыр” спорт мәктәбе директоры Ирек Яраханов көрәш кагыйдәләре белән  таныштырып үтте. Бу көнне Актанышта көрәш буенча республика беренчелеге ярышлары да уздырылу сәбәпле, бил алышучыларның байтагы анда киткән иде. Тренерлар Ра-ил Ильясов белән Зөфәр Хәкимов та өйрәнчекләре белән шул сәбәпле монда үткәрелгәнендә катнаша алмады. Ярышта Буа, Саба, Апас, Югары Ослан районнарыннан килгән 1995 елда һәм аннан соң туган 59 яшүсмер катнашты. Өлкәннәр 60 килограммнан алып 130 килограммга кадәр авырлык үлчәвендә бил алыштылар. Иске Тинчәле, Иске Суыксу, Карлы, Яңа Чәчкап мәк-тәпләрендә эшләүче тренерлар Альберт Гобәйдуллинның, Мансур Җамалетдиновның, Рамил Җамалетдиновның, Айрат Габдрахмановның шәкертләре сынатмадылар – үз авырлык үлчәвендәгеләрне егып кына тордылар. 43, 70, 80 килограммга кадәргеләр арасында Иске Тинчәледән Алмаз Нәҗметдинов, Фаил Ильясов, Марат Миначев беренче урынны яуладылар. Иске Суыксудан Илназ Абдрахманов, Булат Гыймадиев 50 һәм 65 килограммга кадәргеләр арасында җиңүче исеменә лаек булдылар. Карлыдан Рамил Әхсәнов, Алмаз Шәрифуллин,  Яңа Чәчкаптан Айрат Гатиятуллин, Буадан Динар Җамалетдинов һәм башкалар да үзләренең өметле булуларын расладылар. Өлкәннәр арасында оста бил алышу үрнәген Ринат Камалетдинов, Альберт Җамалетдинов, Илназ Гайнуллов, Эдик Вәлиуллин, Радик Сафиев, Радик Мохтәров, Җәүдәт Гайнуллин кебек киң танылу алган спортчылар күрсәтте. Районнар арасында буалыларга тиңнәр табылмады. Сабалылар икенче, Апас районы командасы өченче урында. Призлы урыннарны яулаучыларга яшьләр эшләре, спорт һәм туризм бүлеге начальнигы Ленар Вәлиуллин бүләкләр тапшырды. Фоат абый җиңүчеләргә үзе әзерләгән бүләкләрен бирде, хакимияткә, элеватор, шикәр заводы, “Комплект-Сервис+” җәмгыяте җитәкчеләренә, спонсор буларак ярдәмнәре өчен зур рәхмәтен белдерде. “Дорсервис” җәмгыяте директоры вазифасын башкаручы, Тәтеш районы Сабан туенда милли көрәш буенча 20 тапкыр җиңүче, 10 тапкыр абсолют батыр исеменә лаек булган Назыйм Фәхретдинов тарафыннан бирелгән “Социалистик Татарстан” (“Ватаным Татарстан”) газетасын Фоат абый олы бүләк кебек кабул итте. “Үзем турында 1971 елда мәкалә чыккан сан үземдә сакланмаган. Бергә көрәшеп йөргән атаклы спортчылар Раббани Гайфуллинның, Данил Галиевнең, Риф  Мадьяровның, Наил Хәмидуллинның фоторәсемнәрен күреп, үзләре белән күрешкән кебек булдым, - диде. Назыйм Нургали улы кагыйдәләрне төгәл үтәп көрәшкәне өчен Апастан килгән спортчы Рафаэль Хәсәновка кул сәгате бүләк итте.