Сабантуй “исе килә”

Быел беренче ат чабышлары Зур Боерган авылында узды. 

Өч ел элек “Вамин-Буа” агрофирмасы директоры Раил Хисамов һәм май-сыр комбинаты җитәкчесе Фәнил Шәйхаттаров инициативасы белән корылган ипподромда алдагы ярышларда 5 ат кына катнашса, быел аларның саны 32гә җитте. “Тахаръял”, “Вамин-Буа” бахбайлары хәзер Ульяновск өлкәсе, Чуашстан республикасы, Тәтеш районы чабышкылары белән дә ярыша. “Гигант” бүлекчәсе җитәкчесе Валерий Малышев алдан халыкны язгы чәчү йомгаклары белән таныштырып үтте. Казанда үтәчәк Универсиада утының районыбызның Зур Боерган һәм башка авыллары аша ике тапкыр үтүе хәбәрен дә тыңлаучылар шатланып кабул иттеләр. Раил Хисамов агрофирмада атлар үрчетүгә игътибар бирелүгә тукталды. Шәмәк, Иске Мәртле, Зур Боерган авылларыннан ярышта күп атлар катнашуы шул хакта сөйли. 

Ниһаять, старт бирелде. “Миссияләрен” яхшы аңлаган чабышкылар бердәм алга ыргылдылар. Алар 1600 метр араны бер тапкыр уздылар, ә юртакларга (көймә белән), күп булгач, сигез мәртәбә старт бирелде. Йөгерекләрдән беренче урында “Тахаръял” агрофирмасыннан Веселица аты. Ә аны Николай Нестеров иярләгән. Юртаклар арасында хөкемдарларга – “Буа ипподромы белән дәүләт завод конюшнясы” дәүләт учреждениесе җитәкчесе Шәүкәт Салиховка һәм дәүләт ветеринария берләшмәсе начальнигы Тәлгать Юнысовка җиңүчене билгеләү үтә дә кыен булды. Берьюлы диярлек килгән юртакларның финиш күрсәткечен секундлар гына аерды. Нурвахит авылыннан Илсур Галимҗановның Пульман кушаматлы аты, Иске Мәртледән Юрий Кузьмин, ипподромнан Мансур Мифтахетдинов, Зур Боерганнан Альберт Ханбиков, Күл Черкененнән Герман Кошкин иярләгән бахбайлар да җитез булдылар. Зур Шыгырдан авылыннан алып килгән атның җайдагы 85 яшьлек Гали Әхтәмов исә барысының да исен җибәрде. 

“Тәтештән, Чуашстаннан килүчеләрнең тәҗрибәләре белән танышу безнең спортчылар өчен бик файдалы. Сабантуйларга әзерләнү өчен старт булды бу”, - диде Буа ипподромының әйдәп баручы зоотехнигы Айрат Шәрәфетдинов.

Ахырдан җиңүчеләргә һәм катнашучыларга “Вамин-Буа”, “Тахаръял” агрофирмалары, аларның бүлекчәләре, Боерган авыл Советы хәстәрләгән Мактау грамоталары һәм бүләкләре тапшырылды. Берәү дә игътибарсыз калмады.