“Буа-Алан” көязләнә

“Буа-Алан”да тагын дүрт көннән Сабантуй гөрләячәк. Быел ул халыкны тагын да көязләнеп көтә.

–Татарларның гына түгел, республикада яшәүче барча милләтләрнең уртак бәйрәменә әверелгән Сабантуйга быел да зур әзерлек белән киләбез. “Буа-Алан”ны матурлау, бизәү, өлкәннәр һәм балалар өчен уңайлыклар тудыру буенча хезмәт ахырына якынлашты, - ди район башкарма комитеты җитәкчесенең социаль мәсьәләләр буенча урынбасары Мөдәррис Гайфуллин. 

Мәйдан төзекләндерүне дә таләп итә. Быел яз көне куәтле боз ташкыны “Мәхәббәт күпере”н җимерде. Бәйрәмгә кадәр шикәр заводы эшчеләре яңасын сафка бастырырга өлгерделәр. Кунакларны мәйданда, халкыбызның кунакчыллык, татулык, киң күңеллелек кебек сыйфатларын гәүдәләндереп, поролон һәм башка материаллардан эшләнгән әби белән бабай каршы алачак. Балалар турында аерым кайгыртучанлык күрсәтелә. Җырлы-биюле бәйрәмне ачу тантанасында катнашучылар өчен трибуна астындагы киенү-чишенү бүлмәсе идәнендә элек ком булса, быел бетон түшәлде. Балалар мәйданчыгы тирәсендә өсте ябулы 36 “гөмбәчек” урнаштырылды. Узган елның көзендә мәйдан тирәсенә 1 меңнән артык төрле куаклар утыртылган иде. Район мәдәният идарәсе начальнигы Ренат Гыймранов яшеллек язмышы өчен борчылып: 

– Йөзләрчә кешенең хезмәтен юкка чыгармыйсы иде. Агач-куаклар тирәсендә сак булыйк, ботакларына, кәүсәләренә зыян килмәсен өчен тырышыйк, - ди.

Сабантуй мәйданы Казанда үтәчәк Универсиадага багышланган стендлар, лозунглар белән дә бизәлде. Халыкка әлеге чараны яктырткан сувенирлар да тәкъдим ителә. Мәдәният, “МППЖКХ (инженерлык челтәрләре)” җәмгыяте, электр элемтә челтәрләре, гадәттән тыш хәлләр хезмәтчелеге, урман хуҗалыгы, төзүчеләр һәм башка оешмалар объектларны төзекләндерү, чистарту, буяу белән шөгыльләнәләр.

Милли бәйрәмдә сәүдә дә гөрләячәк. 

– Үз товарларын реализацияләү өчен урын алырга теләүчеләр алдан безгә гариза бирергә тиешләр. “Сабантуйда азык-төлек сатучылар һәм әзерләүчеләр җәмәгать туклануы оешмаларына һәм алардагы азык-төлекнең, җитештерү чималының сатылу мөмкинлеге турындагы санитар кагыйдәләр нормаларыннан читләшергә тиеш түгел, - ди шәһәр башкарма комитетының территориаль үсеш бүлеге начальнигы Гөлинә Шәрәфетдинова. 

Аның әйтүенчә, иң беренче чиратта, азык-төлек сатучының санитар кенәгәсе булуы шарт. Алкогольле эчемлекләр, тавык итеннән шашлык, пылау пешереп сату тыела. Яшелчә, җиләк-җимеш, соклар, камыр ризыклары, суыткыч булганда туңдырма, өчпочмак реализацияләргә рөхсәт бар. Елдагыча трибунага бару юнәлешендә сату рәтләре, халыкның кул эшләре күргәзмәсе эшләячәк, авыллардан иртәнге сәгатьләрдә үк чүпләмәле сөлгеләр, чаршау-кашагалар белән бизәлгән, кыңгырау таккан, тарантаска җигелгән атларда гармун тартып, җырлап киләчәкләр. Мәйданчыкларда авыл һәм шәһәр үзешчәннәре чыгыш ясаячак. Әмма төрле төсләр тамашасы турында алдан сөйләп бетереп булмый. Үзең барып күрүдән дә яхшысы юк. Килегез,”Буа-Алан” сезне көтеп кала.