Факел уты кайдан “йөриячәк”

Универсиада утының безгә 2 июль көнне килеп җитәчәген хәбәр иткән идек инде. Бүген аны кабул итүгә әзерлек иң кызуында – эстафетаның район буйлап маршруты, факел тотып баручылар, волонтерлар исемлеге билгеле, юллар, стадион төзекләндерелә, маршрут җиһазлана.

Район башкарма комитеты җитәкчесенең  социаль  мәсьәләләр буенча урынбасары Мөдәррис Гайфуллин әйтүенчә, факел тотып баручылар  Буа аша  ике  мәртәбә  үтәчәк. Тәтеш районыннан Чүпрәлегә юнәлгәндә аларны Иске Борындык, Боерган авыллары халкы сәламләячәк. Ә Чүпрәледән Буага,  Чуаш Киштәге, Кече Боерган, Татар Биморзасы, Иске Суыксу, Карлы авыллары аша узып, шәһәрнең Ефремов, Вахитов урамнары буйлап шәһәр үзәгенә киләчәкләр (схемада уклар белән күрсәтелгән) . Биредә,  Ял үзәге каршындагы сәхнәдә сәламләү тантанасыннан соң Универсиада утын саклаучылар факелны кабызачаклар һәм эстафета старт алачак. Беренче булып 213  метр араны узу хокукы район халкына яхшы таныш шәхес, “Яшьлек” спорт мәктәбе тренеры Рифкать Бикмуллинга бирелә. Бу көнне  Универсиада утын тотып йөгерү бәхетенә  районнан 27 һәм кунаклардан 2 кеше ия булачак.       Р. Люксембург, Комсомол, Космовский урамнарын колачлаган эстафета В. Трусенев исемендәге үзәк стадионда  Универсиада касәсен кабызу белән төгәлләнәчәк. Соңгы этапта йөгерү һәм бу  җаваплы миссияне үтәү районның танылган яшь спортчысына тапшырыла. Аның исемен әлегә сер итеп сакларга булдык. 

Ә Универсиада  уты килеп җитү, эстафета старт алу вакытын киләсе саннарда аерым хәбәр итәрбез. Бу тантаналы мизгелләрне теләгән барлык кеше  күреп калырга тиеш. 

– Районыбыз, шәһәребез кунаклар хәтерендә  чисталыгы, төзеклеге  белән истә калсын иде. Иң элек факел утын тотып баручылар маршруты узачак авылларда, шәһәрдә яшәүчеләрдән капка төплә- реннән төзелеш материалларын, иске техниканы             алуларын, өй яннарын, агрофирмалар, оешма-предприятиеләр, сәүдә нокталары җитәкчеләреннән территорияләрен, юл буйларын тәртипкә китерүне, сорыйбыз, - ди Мөдәррис Идрисович.

Һәр  хуҗа да кунакны өен җыештырып каршы ала, ә Буа –  уртак йортыбыз. Килүчеләр алдында  йөзебез ак булсын, дисәк , йорт тирәләрен,  капка төпләрен чәчәкләргә күмик.  Матурлык, чисталык Универсиада өчен генә түгел,   үзебезгә кирәк.

.