Уннан – унга: алкоголь сатмаска һәм сорамаска

Рөстәм Хәбибуллин, ТР Дәүләт алкоголь  инспекциясенең Яшел Үзән территориаль органының контроль-инспекция бүлеге белгеч-эксперты:

- Кичке уннан иртәнге унгача  кибетләрдә алкогольле эчемлек сатылмый. Бу  хакта сатучы да, сатып алучы да яхшы белә. Ләкин  контроль-инспекция бүлеге белгечләре оештырган  тикшерү законның барлык сәүдә нокталарында да карусыз үтәлмәвен ачыклады.Әлшидәге  ике кибеттә  иртәнге 8.30 сәгатьтә, ә Яскүлдә 9.20 сәгатьтә  сыра сәүдәсен башлаганнар. Сатучыларны 3тән 4 мең сумга кадәр штрафлар көтә. 11 июнь көнне кабат тикшерү барышында Әлши кибете сатучысының 9.35 сәгатьтә янә сыра сатуы ачыкланды. Аңа бу юлы катгыйрак җәза биреләчәк.

Күптән түгел Дәүләт Думасы каравына РФ административ хокук бозулар турындагы  кодексына төзәт- мәләр кертелде. Депутатлар 21 яше тулмаган кешегә алкоголь сатучыны гына түгел, сатып алучының үзен дә җәзага тартырга тәкъдим итәләр. “Эләктеңме” –  500дән 1000 сумгача штраф! Ә  инде  яше дөрес язылмаган ялган документ күрсәтсә, аны 10 сәгатькә кадәр мәҗбүри эшләргә җәлеп итәргә мөмкиннәр. Әгәр бер елда берничә тапкыр бу эштә тотылса, мәҗбүри “хезмәт дәресләре” 10нан 50 сә гатькә кадәр озайтылырга мөмкин. 

Лицензиясез алкоголь продукциясе әйләнеше өчен җаваплылыкны кырыслату  тәкъдиме белән закон проекты да кертелде. Анда, товарны тулысынча конфискацияләүне саклап, штрафларны тагын да үстерергә кушыла – гражданнар өчен 30дан 50 мең сумгача. Килешегез, хәзерге 2-2,5 сумга карата шактый зур чыгым. Вазифаи затлардан исә җәза рәвешендә 100-200 мең сумга кадәр (хәзер 4-5 мең сум), ә юридик затларга 300дән 500 мең сумгача (хәзер 40-50 мең сум) штраф түләттерү карала. Депутатлар җинаять җаваплылыгын көчәйтү турында да сүз алып баралар. Мәҗбүри эшләрне 480 сәгатькә кадәр срокка озайтуны, яисә 5 елгача ирегеннән мәхрүм итүне карыйлар, плюс 600 мең сум штраф.