Алмаз Абдрахманов БДИның барлык фәннәре буенча югары баллар җыйды
Татарстан Республикасы Буа муниципаль районы Яңа Чәчкап урта мәктәбенең 11 сыйныф укучысы Алмаз Абдрахманов барлык фәннәр буенча да югары баллар җыйды (профильле дәрәҗәдәге математика -84 балл, рус теле - 87 балл, информатика - 80 балл).
Чыгарылыш сыйныф укучысы бердәм дәүләт имтиханнарына кагылышлы сорауларга җавап бирде.
- Алмаз, имтиханнарга әзерлек өчен күпме вакыт бирдең?
- Бердәм дәүләт имтиханнарына әзерлек, бер яктан, бик кызыклы, икенче яктан, бик катлаулы булды. Бу сынауга күп вакыт бирергә туры килде. Кайчагында, бигрәк тә имтиханга бер атна кала, көнгә 8-9 сәгать тирәсе әзерләндем.
- Имтиханнарны уңышлы тапшыру серләре турында сөйлә әле?
- Имтиханны уңышлы тапшыру бары тик аңа ныклап әзерләнсәң генә тәэмин ителәчәк.
-Мондый югары нәтиҗәләргә ирешергә ярдәм иткән остазларыңны сөйлә әле. Алар нинди роль уйнады?
- Остазлар, беренче чиратта, әзерлектә дөрес юл бирүче кешеләр. Мин көн саен вебинарлар узган онлайн мәктәптә укыдым, өй биремнәрен эшләдем, ә нинди дә булса темага төшенмәгәннәргә кураторлар ярдәм итте. Шулай ук минем мәктәп укытучылары миңа үз белемнәрен 11 ел дәвамында тапшырдылар, бу, һичшиксез, үз җимешләрен бирде!
- Киләчәккә планнар нинди? Кая укырга керергә җыенасың һәм нинди белгечлек буенча?
-Хәзер мөмкинлекләр бик күп. Мин КФУга (Казан федераль университеты) яки КНИТУ-КАИга (А. Н.Туполев исемендәге Казан милли тикшеренү техник университеты – КАИ) "Программалы инженерия" факультетына укырга керәсем килә.
- Киләсе елда БДИ тапшыручыларга нәрсә киңәш итәсең?
-Беренчедән, имтихан тапшырачак барлык укучыларга уңышлар телим. Икенчедән, әзерләнегез, вакытны кызганмагыз, иренмәгез, һәм барысы да, һичшиксез, эйбәт булачак!