Универсиада уты килде каршыладык, күрдек һәм озаттык

Күптән көткән Универсиада уты сишәмбе кичендә, ниһаять, безгә дә килеп  җитте. Олысы-кечесе бу манзараны күреп калырга ашыкты – шәһәр үзәгенә, Р. Люксембург, Комсомол, Космовский урамнарына агылды.  Чүпрәледән килүче Универсиада утын саклаучыларны федераль трасса буенда урнашкан авыллар халкы сәламләде.

Шәһәр үзәгенә күпкә алдан җыелды халык. Эстафетаның беренче факелын кабызу тантанасы  узачак Ял үзәге каршындагы  сәхнә әлегә район үзешчәннәре карамагында. Менә колонна шәһәр үзәгенә килеп керде. Умарта илен хәтер-ләткән халык сәхнәгә елышты. Чү, бераз вакыт  бар икән әле. Анда волонтерларның берсе күтәрелеп,буалыларны сәламләде, кәефләрен сорады – мондый көнне ул начар була аламы соң?! Егет  яшьләр уеннарына кагылышлы сорауларга тиз һәм төгәл җавап бирүчеләргә Универсиада логотибы белән өч бейсболка да бүләк итте әле.

Аннан ул сәхнәгә муниципаль район башлыгы  Азат Айзетулловны, ТР Дәүләт алкоголь һәм кулланучылар хокукларын яклау инспекциясе җитәкчесе Игорь Марченконы, ТР Дәүләт Советының законлылык һәм хокук тәртибе буенча комитеты  рәисе Шакир Яһудинны, муниципаль район башлыгының беренче урынбасары Илдар Еремиевны, беренче булып 213 метр араны узачак “Яшьлек” спорт мәктәбе тренеры Рифкать Бикмуллинны һәм Утны саклаучыларны чакырды. Менә алар Азат Айзетуллов тоткан факелны кабыздылар, ул кулдан-кулга күчеп, Рифкать абыйга тапшырылды һәм эстафета башланып китте. 29 факел йөртүче бер-берсеннән кулларындагы  факелга ут алып, үз этапларын уздылар. Стадионга  утны картлар һәм инвалидлар өчен интернат-йорттан  Александр Иванов алып керде. Ә Универсиада касәсен көчле алкышлар астында танылган яшь чаңгычы Артур Меметов кабызды. Эстафета тәмам, миссия үтәлде.

Истәлеккә чып-чын факел,  ул музейда сакланачак, матур теләкләр, җыр-биюләр, онытылмаслык хатирәләр калды. Соңыннан бердәм формаларда үзәк стадиондагы сәхнәгә кү-тәрелгән факел тотып баручыларга һәркем  сокланып карады. Алар  һәрберсе районда спорт үсешенә өлеш  керткәннәр. Рифкать абый ике укучысы – Артур белән Алмаз Бикмуллин да алар арасында булуы бе-лән горурлана. Александр Иванов инвалидлар арасында коляскада узышу,  фигуралы йөртү буенча республика бәйгеләрендә җиңүләр яулаган.

- Мине шулай олылаулары өчен  күңелем булды, рәх-мәт, - ди. 

Кунакларның үз фикере – буалылар һәр яктан булдыра,  һәммәсе  утны кү-рергә чыккан бугай, диләр. Мондый касә дә районнардан бездә генә икән. Башкаларында күчеп йөртелүчесен кабызганнар.