Милли кием хатын-кызны бизи

Картаймышлы көнендә кызык шөгыль тапты Чуаш Киштәге авылында яшәүче Вера Емельянова – хатын-кыз милли баш  киемнәре тегә башлады.

Гомере буе  мәктәптә эшләде үзе. Бер кызык ягы бар иде рус теле һәм әдәбияты укытучысының – һәр теманы тарихка бәйләргә яратты. Үзе дә туган халкының йолалары, гореф-гадәтләре белән чын-чынлап кызыксынды. Бигрәк тә борынгы милли киемнәр турында күп укыды. Дөнья, гаилә мәшәкатьләре белән ел арты ел үтте. Һәм пенсиягә чыккач кына ветеран педагог кулына тукымалар, сәйләннәр алып, чуаш хатын-кызлары милли баш киемен тегәргә кереште. Газета-журналлар, китаплардан аларның өлгеләрен тапты. Ә кибеттә сәйләннәрнең ниндие генә юк, бер төргәк кызыл тукыма да күтәреп кайтты. Аннары 5 тиенлек бакырлар җыя башлады.

Әзер башлык җиңел түгел: ярты метр тыгыз тукыма, ярты килограмм сәйлән, 250 данә уртача һәм аннан кечерәк тәңкәләр (көмеш булса тагын да яхшы) анда. Авырлыгы кайчак 3 килограммга кадәр җитә.

Вера апаның ике атна дәвамында тегелгән беренче баш  киеме үк сокландыргыч килеп чыкты. Күрше киленнәр дә, кыз туганнар да аны киеп карап көзге каршында әйләнделәр, яшьлекләрен искә алдылар. Бигрәк тә оныклар шатланды. Әбиләре аларга да бүләк ясарга уйлады – кызлар өчен махсус тухья тегәргә утырды. Анысын 10-12 яшьтән алып  кияүгә чыкканчы кияләр. “Хушпу” дигәне кияүдәге  хатын-кызларныкы. 

- Сәйләннәр теккәндә күбрәк төрки халыкларның  милли бизәкләрен үрнәк итеп алам. Үз фантазиямне дә эшкә җигәм, - ди оста. Вера түти коллекциясеннән  барлык туганнар киенә хәзер. Оныклары тәңкәләрне чыңлатып әбиләре тирәсендә бөтереләләр. Кибетләрдә нинди матур башлык сатсалар да, үзенекеләр яхшырак тоела Вера түтигә, чөнки аларга җан җылысы кушылган.