Җылыту сезонын кызуда кайгырт

Районда җылылык сезонына әзерлекне төгәлләү срогы  1 августка билгеләнде. Ә “Буа җылылык челтәрләре” җәмгыяте белгечләре бу срокка ремонт эшләре төгәлләнәчәк, дип ышандыралар.

Шәһәрдә

- Арбаны кыштан, чананы җәйдән әзерләргә өйрәнгән без. Пар казаны биналарында ремонт эшләре планда каралган срокларда барды, - ди район башкарма комитеты җитәкчесенең газлаштыру буенча урынбасары Вәгыйзь Гомәров. Узган ел шәһәрдәге 1 номерлы пар казаны блогына 1, 2 номерлыга 2 данә файдалы эш коэффициенты зур булган термотехник пар казаны урнаштырылу күп проблемалардан азат иткән – кышта буалылар башлыча квартираларда суык булудан зарланмаган. Дөрес, Титов һәм Некрасов урамындагы кайбер йортларда яшәүчеләр квартирада температура түбән булуга дәгъва белдергәннәр. Моны исәпкә алып, җәен Титов урамындагы 14, Напольная урамындагы 32, 31 номерлы йортлардагы барлык фатирларга ике контурлы яңа пар казаннары урнаштыралар, хәзер чират Некрасов урамында 42, 42 “А” номерлы йортларга. Социаль объектларга җылылык бирүче 3 котельныйда көчәнеше100 кВттан да артмаган пар казаннары яңаларына алыштырылды.

“Буа җылылык челтәрләре” җәмгыяте эшчеләре, җәйге айларда җылылык саклау ниятеннән, торбаларны мамык һәм поливинил хлорид тасма белән кабат чолгыйлар. Моның өстенә җылылык системасын юдыру, опрессовкалау эшләре дә көйләнгән. Аннан соң төзелеш нормалары һәм кагыйдәләре нигезендә җылылык трассаларын су басымы белән сынауны үткәрәчәкләр. 

- Мондый әзерлектән соң кышкы аварияләр куркыныч түгел, - дип белдерә Вәгыйзь Гомәров. 

Котельныйларда метан, углерод окисе һәм башка зарарлы газларны сизүче сигнал бирү җайланмаларына стандартлаштыру һәм метрология үзәге аша тикшерү үткәрелгән.

Районда

“Кыят МППЖКХсы” ачык акционерлык җәмгыяте генераль директоры Рәфәгать Хәсәнов белдерүенчә, алар карамагындагы социаль объектлар бүгенге көндә җылылык сезонына 95 процент әзер. Җәмгыять карамагындагы 44 котельныйның 14ендә барлык җиһазлар тулысынча алыштырылган. Чуаш Киштәге, Боерган, Кыят, Протопопово, Янтуган кебек зур мәктәпләрнең котельныйларында эш 1-2 көнгә озаграк сузылса да, графиктан тайпылмаганнар. Шулай ук җәмгысе 14 километр озынлыктагы торбалар чистартылган, буялган. 

- СанПиН нормалары буенча мәктәпләрдә температураны 17-18 градус тотарга тиешбез. Ләкин хәзер күп авылларда балалар бакчасы мәктәп белән бер бинада урнашкан. Нәниләргә җылылыкны 21-22 градуска кадәр күтәрергә кирәк. Шуңа да уку йортында да шушы температура торачак, - ди Рәфәгать Хәсәнов. Соңгы эш итеп яңа җылылык үлчәгеч җайланмалар урнаштырганнар. Элек алар бөтенләй булмаган. 

Җылыту сезонында халыкка авариясез хезмәт күрсәтү белгечләр өчен ел дәвамында актуаль булып кала бирә. Бу уңайдан тиздән районда газ казаннарында эшләүчеләр өчен укулар оештырылачак.