Урынсыз гаражлар, сарайлар алыначак

Шәһәрдә урынсыз “утыручы” гаражларны, сарайларны сүтә башладылар. Киләчәктә әлеге ямьсез, иске корылмаларның берсе да калмаска тиеш.

Сүтү эше  Гагарин урамындагы 11 номерлы йорт янындагы сарайлардан башланды. Аннан шул ук урамның 13, 15 номерлы йортлары янындагы “лабиринтны” күчерәчәкләр. Бу хезмәт “Буа МППЖКХсы”, “Идарәче компания” җәмгыятьләре эшчеләренә йөкләнгән. Аларга шикәр заводы, “Дорсервис” җәмгыяте эшчеләре дә ярдәмгә килә. Ә сүтелгән чүп-чарны кая илтәләр? 

- Иске, черек такталарны, эшкә яраксыз материалларны полигонга ташыйлар, ә яхшырак сакланган бүрәнәләр сорап килүчеләргә бирелә. Соңрак иске сарай, гаражлар биләгән участоклар яхшылап чистартылачак. Моннан 40-50 ел элек төзелгән бу корылмалар тора-бара иске әйберләр складына әйләнгән.  Алар еш кына кәеф-сафа корып утыру объекты булып хезмәт итәләр. Бернинди документсыз, күрсәтмәсез, кемгә ничек ошый – шулай төзелгән гараж-сарайлар янгын куркынычсызлыгы ягыннан да хәтәр. Әлбәттә, корылмалары сүтеп алынган урыннар буш тормаячак – анда МППЖКХ эшчеләре балаларга уен мәйданчыклары, ял итү урыннары ясаячак. Яшәүчеләр үзләре агач-куаклар да утырта алалар.

Былтыр Шафранов урамындагы 20, 22, Төзелеш урамындагы 27, 29, Вокзал урамындагы 92, Тимер юл урамындагы 55, Некрасов урамындагы 23, 25, 33, 42 номерлы йортлар янындагы гаражлар мәҗбүри алдырылды. Арефьев урамының Ефремовтан алып уң яктагы мәйданнары абзарлардан, гаражлардан арындырылгач территория киңәеп, матураеп китте.

Шәһәрнең йөзе үзгәрү күңелгә ятышлы хәл, билгеле, ләкин ярты гасыр буе “минеке” дип йөргән мөлкәтнең хуҗалары сарай-гаражлар сүтелүгә ничек карый? Бу уңайдан  шәһәр башкарма комитеты рәисе Александр НИКИФОРОВка берничә сорау юлладык.

- Александар Алексан-дрович, мәҗбүри сүтелүче гараж-сарайлар арасында мөлкәткә законлы рәсмиләштергәннәре булса, нишлисез?

- Алырга, дигән корылмалар арасында законлы нигездә төзелгәннәре юк. Барысы да үзбуйлап салынган. Ә күчемсез мөлкәт законлы нигездә милеккә рәсмиләштерелгән очракта, билгеле, аның хуҗасына икенче урында тиңдәш корылма бирергә тиеш булыр идек. 

- Ә  күпкатлы йортларда яшәүчеләргә шәхси автомобильләрен төнгегә кайда калдырырга?

- Узган ел бу проблема да хәл ителде. Автотранспорт хуҗаларына гаражларын күчерү өчен “ПМК-5”, сыеклатылган газның куст базасы, терлек сую пункты территорияләре янында махсус участоклар бүлеп бирелде. Рәхим итеп, гаражларын шунда урнаштырсыннар. Күчерү өчен түләүсез техника белән булышабыз.

Расыйх ШӘРӘФЕТДИНОВ, 111 номерлы янгын часте начальнигы:

- Иске материалдан “укмаштырылган”, берничә катлы, “шанхай” тибындагы сарайларга еш кына электр энергиясе дә үзбуйлап сузылган. Җитмәсә сәләмә белән шыплап тутырылган бу корылмаларга ут капса, “эһ” дигәнче янып бетәчәкләр. Моның өстенә урынлы-урынсыз салынган булулары аркасында алар янына янгын сүндерү машиналары көч-хәл белән үтә. Быел гына мондый бер факт теркәлде.   Р. Люксембург 136 номерлы йортянындагы сарайлар янды.