“Авангард”та уракка төштеләр!

“Авангард” агрофирмасы районда беренчеләрдән булып игеннәрне җыеп суктыруга кереште.

Уракка төшәсе техника күптән әзерләнде. Комбайнчылар махсус укытылды. Муниципаль район башлыгы Азат Айзетуллов, район башкарма комитеты җитәкчесе Сәлим Даутов һәм мин килгәндә 18 комбайнның барысы да кырда иде.

- Төшкә кадәр 68 гектар мәйданда көзге бодай суктырып алдык. Елына күрә уңыш мул күренә – контроль суктыруда гектардан 51 центнер чыкты, - ди генераль директор урынбасары Фиргать Кадыйров. Комбайннар артыннан теземнәрдәге саламны тракторчылар Салихҗан Шиһапов, Николай Захаров һәм Зөфәр Садретдинов төргәкләп баралар. Ә ындыр табагына беренче бункер ашлыкны “Нью Холланд” комбайнында Анатолий Андреев озаткан.

Быел көзге бодай җәмгыять буенча 3000 гектарда игелгән. 

- Бу мәйданнан уңыш гектарына 49 центнер тәшкил итә. Мең бөртекнең авырлыгы 41 грамм, дымлылыгы 15 процент, - дип, шатлыгы белән уртаклашты җәмгыятьнең баш агрономы Канәфия Баһаветдинов. 

Штурвал артында утыручылар янына киләбез. Фирзәр Хаттапов белән Дамир Мифтахов тәҗрибәле комбайнчылар. Әле икенче елын гына “Акрос” комбайнында эшләүче яшь механизатор Алмаз Хәлилов аларның киңәшләрен колак яныннан уздырмаска тырыша. Замана машинасына азрак утырып та йөрдем. Кара, ничек уңайлы монда – урамдагы тавыш ишетелми, кондиционер эшләп тора, суыткычта салкын чәй. Бункерга кыштыр-кыштыр бөртек коела, монитордан гектардан чыгышны күзәтеп барасың. Менә, 59 саны калыкты, ышанмыйча, Фирзәр Хаттаповка карыйм. 

- Барысы да төп-төгәл, компьютерны алдап булмый, - ди комбайнчы. Ул арада икенче бункер тулды. Комбайн астыннан ашлыкны  тагылмалы 20 “КамАЗ” автомобиле ташып тора.