Һава торышы хаталарны төзәтергә вакыт бирдеме?

Районда урып-җыю эшләре көннән-көн алга атлый. Хуҗалыклар бер-бер артлы көзге бодай, борчак, арпа суктыруга керешәләр.

Быел да атна-ун көнгә иртәләгән уракка хуҗалыклар нинди әзерлектә килде? Узган атнада ТР Авыл хуҗалыгы һәм азык-төлек министрлыгының агропромышленность комплексын инженер-техник тәэмин итү бүлеге начальнигы урынбасары Рафыйк Шәкүров җитәкчелегендәге, составында министрлыкның игенчелек өлкәсен үстерү бүлеге секторы мөдире Дмитрий Яшин, район белгечләре, хуҗалыклар җитәкчеләре һәм белгечләре булган конкурс комиссиясе, хуҗалыкларда булып, шуны ачыклады.

Аның барышында төп игътибар урак сыйфаты буенча комиссия төзелүгә, ремонт звеносы, ирекле янгын сүндерү дружинасы булуга, бөртек суктыру комбайннарының төзеклегенә, икешәр механизатор, янгын сүндерү җайланмалары, аптечкалар, махсус эш киеме белән тәэмин ителүгә, ындыр табакларының, үлчәү хуҗалыкларының, бөртек саклау складларының әзерлегенә бирелде. Шулай ук хезмәткә түләү, кызыксындыру чаралары, эш күләменең, ягулык-майлау материалларының чыгымының расланган нормаларын эшләү дә күз уңында булды.

Хуҗалыклар нигездә уракка әзер. Бу көнне “Дружба” агрофирмасы 95 мөмкинлектән 94 балл җыйды һәм конкурс җиңүчесе булып танылды. “Коммуна”ның, “Кыят”ның, “Тахаръял”ның, “Нива”ның, “Авангард”ның әзерлеге 91-93, “Бола”ның 85 балл белән бәяләнде. Ул бары “Вамин-Буа” агрофирмасында гына түбәнрәк – 79 балл-га гына тиң булды. Бу иң элек  запас частьләр белән тәэмин ителүдә тоткарлыклар булуга бәйле.

Рафыйк Шәкүров урыннардагы һәр җитәкче-белгечкә, механизаторларга комбайннарның янгын куркынычсызлыгына, герметиклыгына аерым игътибар бирергә кушты.

- Быел уңыш әлләни зур түгел, шуңа да аны кайчангыга караганда да мөмкин булганча азрак югалтулар белән башкарып чыгарга кирәк. Вакыт барында комбайннарны тагын бер кат бөртек коелу-коелмауга тикшерү зыян итмәс. Кырдан иген ташып торучы автотранспортны да иген җиргә сибелмәслек итәргә кирәк. Сыйфат комиссиясе исә кәгазьдә генә түгел, чынбарлыкта эшләргә тиеш, - ди ул. 

Рәис ЮНЫСОВ, авыл хуҗалыгы һәм азык-төлек идарәсенең җитештерү-маркетинг бүлегенең механикалаштыру буенча консультанты:

- Урак алдыннан барлык хуҗалыкларның аңа әзерлеге район белгечләре тарафыннан да күздән кичерелде. Бүгенге көнгә ачыкланган барлык җитешсезлекләр читләштерелде. Алар күбрәк комбайннарның герметиклыгына кагыла иде. Хуҗалыклар барлык “кыр кораблары”н тагын бер кат контроль тикшереп карадылар. Запас частьләр белән проблема булган “Вамин-Буа”да да эшләр җайга салынды. Конкурс көнендә төзек булмаган дүрт комбайн сафка бастырылды. “Тинчәле”гә 3, “Кыят”ка һәм “Бола”га – 1әр яңа “Палессе GS12” кайтарылды. Хуҗалыкларда сыйфат комиссияләре эшли. Районда урак эшләре һәм туфракны көзге эшкәртү буенча штаб төзелде.