Халык иминлеге өчен вакыт та, көч тә жәл түгел

Агымдагы елның беренче яртысы тәмамланды. Бу чорда районда криминаль торышның ничек үзгәрүе турында Россия Эчке эшләр министрлыгының Буа районы буенча бүлек начальнигы Айрат ХАНБИКОВтан сораштык:

- Без яртыеллык эшчәнлекне чагыштырмача әйбәт тәмамладык. Җинаятьләр саны артса да, без аларны ачу белән оттык. Быел теркәлгән 176 фактның (узган ел 171 иде) 154ендә хокук бозучыларның шәхесе ачыкланды. Җинаятьләр статистикасында беренче урында урлаулар тора. Бигрәк тә фатирлардагы шәхси милеккә кул сузучылар күбәйде. Күп очракта йорт хуҗалары үзләре гаепле. Урамда вакытлыча танышкан, я булмаса моңа кадәр аз аралашкан кешеләр белән кәеф-сафа корып, икенче көнне әйберләре юклыгын беләләр, ә шешәдәшнең исемен дә хәтерләмиләр. Шуңа да гаеплеләрне “кайнар” эздән табу авырлаша. Аннан вакытлыча хуҗасыз калган йортларга да кәкре куллылар “кармак салырга” ярата. Шуңа халык үз милкен саклау турында ныграк кайгыртсын иде.

Икътисад өлкәсендә 34 җинаять очрагы теркәлде. Алар арасында мошенниклык очраклары күп. Күптән түгел бер коррупция факты буенча суд эше төгәлләнде. Анда авыл Советы секретаре булып эшләүче ханым ялган документлар рәсмиләштереп, ялгыз яшәүче әбиләрнең йортларын сатмакчы булган. Хәсрәт “риэлтор” тиешле җәзасын алды.

Районда наркоконтроль хезмәтчелеге бетерелгәч, бу хезмәт безгә йөкләнде. Мин җитәкче буларак, хәйләкәр адым ясадым: аның элеккеге җитәкчесен бү-леккә эшкә алдым. Хәзерге көндә бездә җинаятьчеләрне эзләү төркеме начальнигы булып эшләүче Альберт Шакиров параллель рәвештә наркотикларның законсыз әйләнешен контрольләү эшен алып бара. Ул бу өлкәдә компетентлы белгеч. Сүз уңаеннан, быел наркотикларга бәйле 4 җинаять теркәлде. Балигъ булмаганнар катнашында җинаятьләр саны кимеде. Бу яртыеллыкта бер яшүсмер куян урлап тотылды. Узган елның тиңдәш чорында өч факт булды. Юл-транспорт һәлакәтләре дә үткән елгыдан азрак. Барлыгы 7 ДТП теркәлде. Мондый фаҗигаләрнең күбесе исерек автомобиль йөртүче-ләр аркасында килеп чыга.

- Айрат Равилович, быел резонанслы җинаятьләр теркәлдеме?

- Вольнистан авылында бер факт булды. Урта яшьләрдәге ир-ат төнлә күр-шедә яшәүче бабай йортына кереп, зур суммада акча талап чыккан. Хокук бозучының шәхесен тиз ачыкладык. Шушы көннәрдә генә аңа карата суд булды. Аның карары әле үз көченә кермәгән. Узган ел Боерган авылында әбине көчләгән ир-ат та  үз җәзасын алды. Ул вәхшиләрчә җинаяте өчен алдагы  3 елдан артык гомерен төрмәдә үткәрәчәк. Күпләрне быел  Теңкәш авылында булган юл һәлакәте – “КамАЗ”  автомобиленең клубка килеп керүе  вакыйганың ничек тәмамлануы да кызыксындырадыр. Транспорт белән идарә итүченең баш мие травмасы алуы аркасында үлүе ачыкланды, ә аңа үзенең шәхси автомобилен бирүче ир-ат административ җаваплылыкка тартылды. Бүгенге көндә тикшерү эшләрендә, җимерелгән клубны сүтүдә актив катнаша. Шулай ук яңа мәдәният йортын салганда да булышырга вәгъдә итә.

- Моннан ике ел элек шәһәргә видеокамералар урнаштырылды. Алар җинаятьләрне ачуда ярдәм итәме?

- Әйе. Урлау һәм ДТП ларда гаеплеләрне тануда әлеге видеоязма төп дәлил. Күзәтү мониторлары ОВДның кизү тору бүлегендә урнаштырылган. 

Төгәлләп шуны әйтәсем килә, җинаятьләрне ачуда, профилактикалауда барлык мөмкинлекләрне дә файдаланабыз. Кыскасы, халык иминлеген саклауда вакытны да, көчне дә жәлләмибез.