Кое – изге урын, карап тотыйк, чистартыйк

Су – яшәү чыганагы. Шуңа да кешеләр элек-электән елга-күл буйларына, чишмәләр янәшәсенә урнашканнар. Тора-бара йорт тирәләрендә кое казып, эшне җиңеләйткәннәр. 

Бүген су өйләребездә краннан шаулап ага. Ә менә техника азрак чыгымчылый башлауга, көянтә-чиләк асып, тагын шул кое янына ашыгабыз. Изге урын саналган коеларны, чишмәләрне карап-чистартып тоту исә һәркемнең бурычы.

  Яңа Чәчкап авылында 50ләп кое бар, шуларның 15ен төзәтергә кирәк. Үзәк урамдагы ун су чыганагының икесе җимерек хәлдә иде. Берсе, Зарифулла абый коесы, дип йөртелүчесе, авыл халкы тырышлыгы белән яңадан торгызылды. Бу изге гамәлнең инициаторы Хафиз абый Садретдинов булды. Боҗраларын авыл Советы җитәкчелеге кайтартты, төзәтү, казыту эшләре өчен урамның бар яшәүчесе акча җыйды.

Коены ачу көне авыл халкы, кунаклар катнашында матур бер бәйрәмгә әверелде. Кое янына зур өстәл куелды, хуҗабикәләр анда үзләре әзерләгән сый-нигъмәтләрен тезделәр. Башлап  Әсхәт абый Абдрахманов азан әйтте, Хафиз абый беренче суын алды. Тәмле кое суы салынган самоварлар бер-бер артлы кайнап кына торды. Бәйрәм чәй эчү белән генә төгәлләнмәде әле. Зөлфия Яруллина, Рәис абый Нәгыймуллин, Гүзәл апа Шиһапова, Роза апа Мусина “Фазыл чишмәсе”, “Сания апа суга бара” кебек чишмә-коега багышланган җырларны башкардылар. Хатирәләр дә барланды. Элек яшь киленнәргә су юлын күрсәтү йоласы булган. Мәсәлән, 1958 елда Әхмәт авылыннан килен булып төшкән Розаны нәкъ менә шушы коега беренче мәртәбә Гөлдания Гыйльметдинова алып барган.

Кичкә таба бәйрәм кызганнан-кызды һәм урам Сабан туена әверелде. Кызлар-киленнәр, яшьләре 70тән узган апалар иңнәренә сулы чиләкле көянтәләр асып узыштылар. Капчык киеп, авызга йомырка салынган кашык кабып йөгерү, күз бәйләп әйбер кисү бәйгеләрендә дә олысы-кечесе актив булды, бүләкләр алды. Җыр-бию, уен-көлке таңга кадәр дәвам итәр иде әле, матур яңгыр ява башлагач кына халык тарала башлады.