Беренче олаулар килде

Ашлык кабул итү предприятиесе яңа уңышның беренче олауларын кабул итте.

Элеватор капкасын беренче булып “Авангард”, “Тахаръял”, “Дружба” һәм “Нива” агрофирмалары автомобильләре  узды.

Коллектив әгъзалары яңа уңышны кабул итеп алуга алдан җитди хәстәрлек күрде. Персонал белән төрле укулар үткәрелде. Һәр агрегатта ике сменада ашлыкны өзлексез кабул итү, эшкәртү өчен эшчеләр, белгечләр беркетелде. Предприятиедә хезмәтчәннәргә уңайлы эш шартлары аларның ялларын оештыру буенча да уңайлы шартлар булдыру буенча күп чаралар күрелгән. Алар эш киемнәре һәм кирәкле эш кораллары белән тәэмин ителгән.

Ул көнне агрофирмалардан һәм хуҗалыклардан ашлык төягән берничә машина лаборатория янына килеп туктады. Муниципаль район башлыгы Азат Айзетуллов игенчеләребез адресына җылы сүзләрен җиткерде: 

- Язын басуларда чәчү сыйфат белән башкарылып, үсемлекләр тигез шытымнар бирсә дә, корылык үзенекен итте. Уңыш төрле агрофирмаларда төрлечә өлгерде. Бүген үстерелгән икмәкне югалтуларсыз җыеп алу, орлыкка, фуражга салу, халыкка бирү төп бурыч булып тора. Район буенча көзге уҗым культураларының һәр гектардан чыгышы 30 центнердан да ким булмас, дип көтелә. Борчактан 20 центнер уңыш чыга. Киләчәктә җилемчәлелеге югары булган, корыга чыдам, элиталы югары репродукцияле орлыкларны күбрәк мәйданнарда игүгә игътибарны арттырырга кирәк, - дип,  тантанада катнашучыларга уңышлар теләде.

“Коммуна”, “Авангард” җәмгыятьләре директорлары Җәүдәт Хөсәенов һәм Николай Курчаткин үз чыгышларында элеватор коллективының ашлык төяп килгән олауларны өзлексез кабул итүләрен теләделәр. Предприятие директоры Газинур Хәкимов беренче булып ашлык китерүче хуҗалыклар җитәкчеләренә һәм автомобильчеләргә истәлек бүләкләре тапшырды.

Санаулы минутлар эчендә лабораториядә ашлыкның дымлылыгын анализга тикшереп карагач, приборлар 17 процент күрсәтте.