Буа районында инвалидлар көненә багышланган киң күләмле чара үткәрелде
Бүген Буа шәһәренең Мәдәни үсеш үзәгендә инвалидлар көненә багышланган тантаналы чара уздырылды. Уңайлы залга балалар һәм аларның әти-әниләре чакырылган иде. Залда балаларны әкият геройлары, биек курчаклар һәм кызыклы мастер-класслар каршы алды.
Балаларны Буа районы башлыгы Ранис Камартдинов сәламләде:
- Без традицион рәвештә декабрь башында сезнең белән очрашабыз, бу безнең күркәм традициягә әверелде. Сезнең үсешегезне, ирешелгән казанышларыгызны күрәбез. Бүген ата-аналарга балаларга биргән мәхәббәтегез, кайгыртучанлыгыгыз һәм бәхетегез өчен аерым рәхмәтемне белдерәм. Без сезгә әлеге кичәне һәм бүләкләр әзерләдек. Тиздән Яңа ел бәйрәмендә янә күрешәчәкбез, - дип билгеләп үтте район башлыгы.
Балалар әти-әниләре белән бергә мультфильм карадылар һәм бүләкләр алдылар.