Бүләкнең кечкенәсе юк

Быел Татарстан Республикасы Президенты Рөстәм Миңнеханов инициативасы белән ТР Мәгариф һәм фән министрлыгы, Төзелеш, архитектура һәм торак-коммуналь хуҗалык министрлыгы , матбугат һәм массакүләм коммуникацияләр буенча республика агентлыгы тарафыннан “Үз мәктәбеңә ярдәм ит!” республика акциясе эшләнде. Максаты – белем бирү учреждениеләре проблемаларына, үсеп килүче буынны тәрбияләү өчен заманча шартлар тудыруга булыша алырдай кешеләрнең игътибарын җәлеп итү булган бу күркәм гамәлдән буалылар да читтә калмый. 

Район мәгариф идарәсеннән алынган мәгълүматларга караганда, күп мәктәпләр элеккеге чыгарылышларының, төрле оешмаларның ярдәмен тоярга, бүләген алырга өлгергән инде. “Кыят” ачык акционерлык җәмгыяте капиталь ремонт баручы Кыят урта мәктәбенә 170 мең сумлык идән рейкалары алып биргән. “Дружба” агрофирмасы Протопопово мәктәбе территориясен койма белән әйләндереп алу өчен 104,5 мең сум, “Татптицепром” җәмгыяте җитәкчесе Марс Алиев Яңа Шәйморза башлангыч мәктәбенә шушы максатка 76,5 мең сум акча юнәлтте. “Коммуна” җәмгыяте җитәкчелеге, 30 мең сумга төшереп, Килдураз урта мәктәбенә керү юлларын ремонтлатты, “Әхмәт электромеханика заводы” җәмгыяте канцелярия товарлары өчен 5 мең сум акча бүлеп бирде. Шәһәрнең Р. З. Сәгъдиев исемендәге мәктәбе Буа электр челтәрләре җитәкчесе Владимир Чечковтан спорт шәһәрчеге өчен металл конструкцияләр, “Жилэнергосервис-Буа” җәмгыяте җитәкчесе Наил Әхмәтовтан кул югычлардагы суны җылыту җиһазы кабул итеп алды. Яңа Чәчкап  мәктәбенә Казаннан шәхси эшмәкәр Нияз Заһретдинов көрәш келәме бүләк итте. “Авангард” агрофирмасы акчалата, Назыйф Хисамов азык-төлек белән ярдәм итте. Әлши урта мәктәбенә 1983 елгы чыгарылышлар 6 мең сум акча җыеп тапшырдылар. Уку йортларына 1-3 мең сум күләмендә акчалата булышучы шәхси эшмәкәрләр, фермерлар, чыгарылышлар тагын да бар һәм аларның исемлеге көннән-көн зурая тора. Һәммәсенә рәхмәт, дибез.

Бүләкнең кечкенәсе булмый, чөнки күл бит тамчылардан җыела. Алар һәр мәктәпкә дә тамсын иде.

- 31 августка кадәр дәвам итәчәк  акция туган мәктәбе язмышына битараф булмаган һәр чыгарылыш катнаша ала. Һәрберебез үз уку йорты бусагасын соңгы кат атлап чыкканда рәх-мәтле күз яшьләре һәм билгесез киләчәктән берникадәр курку белән балачагының һәм үсмерлек чорын үткәргән мәктәп белән хушлаштык. Укытучыларыбызны беркайчан да онытмабыз кебек иде. Еллар уза. Тормышыбыз мәктәп елларын акрынлап хәтеребездән “сызып” инде башка киңлекләрдә дәвам итә. Ә мәктәп яши һәм үсә. Һәм без сизмәстән инде әти-әниләр, әби-бабайлар, ә кайчакта өченче буын сыйфатында кабат аңа әйләнеп кайтабыз. Туган мәктәбебезне тагын да яхшырак, профессиональрәк, балаларыңа, оныкларыңа, оныкчыкларыңа ягымлырак итеп күрәсе килә. Мәктәп сүздә генә түгел, чынлыкта да бөтен халыкның кайгыртуына әверелсен иде. Чөнки ул җәмгыятебез үсешенең төп факторы булып тора. Мәктәпкә бүген яшәве җиңел түгеллеге, аның киләчәгенә өлеш кертергә әзер булучы инвесторларны көтүе беркем өчен дә сер түгел. Яшь буынга белем бирү һәм тәрбияләү өчен заманча шартлар тудыруга Сез дә хәлдән килгәнчә ярдәм итә һәм спонсор һәм  меценат буларак үзегез турында якты хатирәләр калдыра аласыз.