Түбәләр яңара, торбалар алмаша

Шәһәрдәге берьюлы 9 күпкатлы йортта капиталь төзекләндерү җәелдерелгән. Әлеге объектларда эшнең барышы белән без дә кызыксындык.

Гарнизов урамында 2 номерлы йортта

Яшәүчеләр төзекләндерүне 25 ел көткәннәр. Подрядчы оешма “ПМК-6” җәмгыяте инде бүген башка объектка күчкән. Ләкин  яшәүчеләр әле эш бетмәгән, дип саныйлар. Йорт буенча өлкән Лариса Мөбарәкшина әйтүенчә, түбә ябылган, су, канализация торбалары алмаштырылган. Боларына тел-теш тидерерлек түгел. Ә төтен юлларын, чорманы җылыту эшләре бөтенләй башкарылмаган. 3нче квартира хуҗасының исә аерым борчуы бар – алар торагы астыннан канализация торбалары уза, тыгылган очракта яман ис чыга, ташландык сулар кире килә. Капиталь ремонт ясаучылар, бу проектта каралмаган, дип, әлеге проблеманы чишүгә алынмаганнар да. Хуҗалар исә, мәсьәләне хәл итүне сорап, идарәче компаниягә гариза язганнар.

Гагарин урамында 3 номерлы йортта

Биредә дә “ПМК-6” ЧҖҖ эшчеләре хезмәт куя. Ремонт 3 атна элек башланган. Йортта түбә ябылган, фасад сайдинг белән тышланган, су, канализация торбалары алмаштырылган. Планда каралганның яртысы башкарылды инде, диләр эшчеләр. Халык ремонттан канәгать.

Некрасов урамында 42 номерлы йортта

Йорт буенча өлкәнне очратып булды. Элек биредә үзәк җылыту системасы файдаланылса, хәзер һәрберсендә индивидуаль булачак. Подрядчы – “ПМК-6”. Алар түбәне яңартканнар, ә торбаларны алмаштырып бетерәчәкләр.

Некрасов урамында42 “А” номерлы йортта

Ничә еллар дәвамында, түбәдән кар-яңгыр суы үтеп, квартираларында ремонт ясый-ясый интеккән яшәүчеләр өчен капиталь ремонт бәйрәмгә әверелгән. “ПМК-6” эшчеләре яңа түбә япкач, бу газаптан котылганнар. Йорт диварлары сайдинг белән тышлангач, яшәүчеләр киләсе кышта квартираларда җылы булачак, дип тә ышаналар. Җылылык, су үткәргеч канализация торбалары яңартылган.  

- Тизрәк төгәлләсеннәр генә. Подрядчыга зарыбыз юк,- диде йорт буенча өлкән Нина Штыркина. 

Некрасов урамында25 номерлы йортта

“ПМК-6” җәмгыяте остасы Илһам Садриев үзе дә объектта иде. Эшчеләр чорманы, төтен юлларын заманча материал – минераль мамык белән тышлыйлар. 

- Ремонтны ахыргача башкару өчен төзелеш материаллары кайтып җитмәгән. Тик бу безнең өчен проблема түгел, билгеле срокка эшне төгәлләячәкбез, - диде оста. Шулай ук йорт эчендәге барлык төзекләндерү күләме дә башкарылган. Без бу хакта квартира хуҗаларының үзләреннән дә сораштык. 

- Молодец, әйбәт эшлиләр, мондый яңартуны күптән көткән идек, - дип җавап бирделәр алар.

Вокзал урамында 82 номерлы йортта

Капиталь ремонт башланып кына килә. Моңарчы яшәүчеләр канализация торбаларының еш тыгылуыннан интеккән. Былтыр пычрак сулар урамга да аккан. 

- Капиталь ремонт барышында канализация юлларын яңартсыннар иде, - диләр йортның беренче катында яшәүчеләр. Ә бер урта яшьләрдәге ханым: “Кыш буе квартираларда җил уйнады. Түбәне яптылар инде, йортны  тышласалар да бик әйбәт булыр иде”, - дип өстәде. Ремонт-чыларны бу көнне әлеге объектта очратмадык. Ремонт эшләре сентябрь уртасына кадәр барачак әле. Яшәүчеләрнең барлык теләкләре үтәлер, дип ышанып калабыз.

Арефьев урамында9 номерлы йортта

Биредә ремонт эшләрендә “тәнәфес” ясарга туры килгән. “Буа МСО”сы җәмгыяте эшчеләре йортның беренче катында ремонтны төгәлләгәннәр. Эшне алга таба дәвам итүне икенче катта яшәүчеләр тоткарлык ясый. Йорт буенча өлкән Гөлүсә Гыйниятова әйтүенчә, хуҗалар, квартирага кыйммәтле ремонт ясалган, дигән сылтау белән подрядчыга эшләргә ирек бирмиләр. Даулашу прокуратурага кадәр барып җиткән. Әлегә нәтиҗәсез. Эшчеләр бригадасы исә вак-төяк эшләрне башкару белән мәшгуль.

Комсомол урамында1 “А” номерлы йортта

Объектта ремонт вакытлыча тукталган. Йорт буенча өлкән Рөстәм Юнысов белдерүенчә, “ПМК-6” җәмгыяте эшчеләре моңа кадәр түбә япканнар иде, канализация, су үткәргеч торбаларны алмаштырганнар. Подъездга пластик тәрәзәләр куйганнар. 

- Җитешсезлекләр күренсә, үзем киңәш биреп эшләтәм, әлегә без бик канәгать, - ди Рөстәм абый. 

Жорес урамында 114 номерлы йортта

Йортта – тынлык. Йорт буенча өлкәнне дә күрү насыйп булмады. Квартиралар ишекләрен шакып, төзекләндерүнең торышын сораштык. Яшәүчеләр әйтүенчә, подрядчы “Буа МСОсы” түбәне яңарткан, нигезгә отмоскалар ясый  башлаган, канализация торбаларын алмаштырган. Соңгысында җитешсезлекләр бар – яңа торба кертү өчен тишкән урыннарны каплап бетермәгәннәр. Күбек азрак төшкән. Фатир хуҗалары аптырашта: әлеге эшне ахырынача җиткерерләрме, әллә инде үзләренә калачакмы?

Күрәсең,  күпкатлы  йортлардагы капиталь ремонтның плюслары да, минуслары да бар. Шулай ук җитешсезлекләрне төзәтергә дә вакыт җитәрлек әле. 

- Быел шәһәрдәге 9 йортта капиталь ремонт ясала. Моңа федераль, республика, район бюджетларыннан, күчемсез мөлкәт хуҗаларыннан җыелган 26 миллион сум акча тотыла. Подрядчы оешмаларны да читтән эзләмәдек. 7 объектта ремонт эшләрен “ПМК-6”, икесендә  “МСО” җәмгыяте эшчеләре башкара. Капиталь ремонтны төгәлләү срогы 15 сентябрьгә билгеләнгән. Планны алдан үтәргә дә ният бар.